Aalisagartorneq peqqinnarunnaarpoq
Aalisakkat Europami tunineqartartut amerlanersaat ilimagisamiit killormorluinnaq aalisakkat orsuannik omega 3-mik peqqinnartumik akoqanngillat, omega 3-torluartaraannimigooq soorlu uummatip taqarsuatigut milittoorneq pinngitsoorneqarsinnaavoq. Aalisakkap orsua taannarpiaq aalisagartorluartarnissamut kaammattuutigineqartarpoq, maannali aalisagaarniaq apereqqartariaqartalissavarput aalisakkat pisiariniakkavut sunik nerisaqarsimanersut.
Aalisakkat Europami pisiniarfinni pisiassat ilarpassui aalisakkanik tukertitsivinneersuunngikkunik imermit tarajuunngitsumeersuusarput. Tamakku nalinginnaasumik aalisakkat orsutortinneqartarput, maannali naasut isserisa orsuat atorneqaraluttuinnarpoq. Naasut isserisa orsuat aalisakkat orsuisuulli peqqinnartiginngilaq, taamaammat oqartoqartalerpoq aalisakkat peqqinnarunnaartut.
Aalisakkat allanik nerisinneqartalernerannut pissutaavoq aalisakkat orsuata akitsorujussuarsimanera. Tamannali Kalaallit Nunaannut iluaqutaasinnaassaaq, Royal Greenlandimi pisortaaneq, Flemming Knudsen, oqarpoq.
-Kalaallit Nunaanni aalisakkat aalisakkat orsuanik peqqinnartumik omega 3-mik akoqarluarput, pingaartumik qalerallit. Taamaammat aalisakkanik avammut uagut tuniniaasarnitsinnut tamanna iluaqutigissaqaarput, Flemming Knudsen Radioavisimut oqarpoq.
Tassa aalisagaq tassaajunnaarpoq aalisagaq nalinginnaasoq. Brian Thomsenip, Danmarkimi aalisakkanik nioqqutissiorfissuarmi Dansk Akvakulturimeersup, siumut takorloorpaa aalisagartornerup peqqinnarpallaarunnaarnera pillugu atuisut siunissami annertuumik nassuiaattariaqartalissallugit.
