Isiginnaartitsissutip soqutigineqarluarnera Aalborg Teaterip tuppalliutigaa

Iluatitsinerujussuarmut pissutaagunarpoq, isiginnaagassiaq isummiutereersimasat oqallisiginissaannut periarfissiimmat, Aalborg Teaterimi isumaqarput.

Aalborg Teaterimi ussassaarinermut pisortap Thomas Villefrancep isiginnaagassiap "Kalaallit Aalborgimiittut" soqutigineqarnerujussua assut naammagisimaarpaa.

- Soqutiginninnerujussua tupinnaannarpoq.

Misiliilluni takutitsisoqanngitsorluunniit billetit tunineqareerput.

Aalborg Teaterip Borgersceneani aatsaavissuaq isiginnaartitsissut aallartinngitsorluunniit taama iluatsilluartoqartigaaq. Isiginnaagassiami inuit naliginnaat nammineq oqaluttuassartatik oqaluttuaraat.

Maannakkut sammineqarnerusut tassaapput kalaallit Danmarkimiittut inuit isummiuteriigaat pillugit misigisartagaat.

Isiginnaartitsisarfiup periarfissiineri tassarpiaapput soqutigineqarnerujussuanut, Thomas Ville-
france isumaqarpoq.

- Isummiuteriikkat tusagassiuutit sammigaangatigit ajornartorsiutitut saqqummiunneqartarput. Assersuutigalugu kalaallit pillugit nalunaarusiat nutaarsiassaqartitsivinni assigisaannilu sammineqaraangasa. Maanili isiginnaartitsisarfimmi isummereertarneq pillugu ajornartorsiut allatorluinnaq samminissaanut periarfissaqarpugut.

Aamma atuaruk ASSIT Kalaallit isiginnaartitsinissaannut isissutissat nungulersut

Isiginnaagassianik ilitsersuisartup Nicolei Faberip nammineq kalaallit Kalaallit Nunaallu pillugit ilisimasakinneranik aallaaveqarpoq.

Ussassaarinermut pisortaq naapertorlugu nalunaarusiat marluk qanittukkut kalaallit Danmarkimi inuunerat pillugu saqqummiunneqartut,  isiginnaartitsissutip soqutigineqarnerujussuanut peqqutaaqataasut, taakkumi ingammik danskit tusagassiuutaanni assut uitsatigineqarsimapput.

- Isumaqarpunga isiginnaartitsissusiatta ukkatarilluarneqarneranut nalunaarusiat piffissami matumani saqqummiunneqarnerat peqqutaaqataasut, ilitsersuisartoq oqarpoq.

Isiginnaartitsissut ullumi sisamanngornermi ammaanissaq sioqqullugu isiginnaartitsissutigineqassaaq, arfininngorpalli takuteqqaarneqassaaq.

Aalborg Teaterip takutitsinissat soqutigineqangaarmata sisamanik ilasimavai.