Aalborg kommune immikkortitsinnginnerarpoq
- Kalaallit Sjællandimiusorluinnaq soorunami sullinneqarput: Kommunip allaffianut iseraangat, suliassaq aallartittarparput. allaanerusumikiliortarnissaq takorloorsinnaanngilarput., Aalborg Kommunemi ilaqutariinnut suliffeqarnermullu ingerlatsivimmi politikkikkut qullersaasoq Mai-Britt Iversen oqarpoq.
Tassalu taamaammat Kofoeds Skolemit oqaatigineqartoq Aalborg Kommunemi aalassaataasimavoq:
- Taama oqartoqarsimanera kamaatigeqaara. Suliassat pitsaanerpaamik naammassineqarsinnaaqqullugit, kalaallinut immikkoortortaqarpugut, allanit sulisoqarnerusumik. Tassami kalaallit ajunngitsumik pineqarnissaat, Aalborgimi anguniartupilussuuarput, Mai-Britt Iversen, Nunatsinni najugaqarlunilu sulisimasoq, oqarpoq.
Issuaanerlunneq, Aalborgimi Kofoeds Skolep pisortaanit, Helle Rønnimit, ullumi nassuiaatigineqarpoq. Taannali sammineqartoq pillugu kommunimik ataatsimeeqateqareertinnani KNR-imut oqaaseqarusunngilaq.
Oqaatigisanik utertitsisoqarnissaanik Kommunemit piumasaqassanersoq, maanna isumaliutigineqarpoq. Kofoed Skole aallaqqaammut nassuiaateqarluni erseqqissaavoq, tassani isumaqannginnamik, kommune kalallinik assigiinngisitsisarsoq inunnilluunniit isumaginnittoqarfimmi isiginngitsuusaartartut.
Taava aamma Kofoed Skolemut piumasaqaatit tunniunneqarput:
- Kofoed Skoletut ittunit neqeroorfigineqaraangatta, naatsorsuutigilluinartarpara, kalaallit Aalborgimiittut danskit oqartussaqarfiinut attaveqartinneqarnissaat isumagineqartassasoq. Tassami suliniutit immikkuullarissut maani ilaaterusuppavut qulakkeerusukkatsigu, inunnik sumut saaffiginnissalluni nalornisoqanngitsoq, Mai-Britt Iversen oqarpoq
Kofoeds Skole-miit oqaaseqarnerup kingunerisaanik Folketingip isumaginninnermut ataatsimiititaliaani siulittaasoq, Dansk Folkepartimeersoq Martin Henriksen, isumaginninnermut ministerimut allappoq, assigiinngisitsineq unitseqqullugu.
Taamaliornerli ministerip kommunimut saaffiginninneranik kinguneqanngilaq, kommunili Dansk Folkepartip kommunalbestyrelseimi ilaasortaatitaanut, Tommy Eggersimut, nassuiaasimasoq, Mai-Britt Iversen oqaluttuarpoq.