Aalborg-imi kalaallit malersugaasut
Aalborgip Kangisissuani kalallit najugallit arlallit tamaani najugaqarnertik toqqissisimanarinngilaat, nuunnissartillu assut eqqarsaatigaat. Inunnik isumaginnittut, kalaallinut qanittumik attaveqartartut, tamanna uppernarsarpaat, kalaallillu peqatigiiffii, Danmarkip Radioata immikkoortortaqarfiata, DR P4 Nordjyllandip, oqaloqatigisimasaasa tamanna aamma uppernarsarlugu.
- Tamaani ajornartorsiuteqartoqartoq tusartarparput, kalaallillu inuusuttut arlallit tamaani najugallit malersorneqartutut misigisimasarput, kalaallit Aalborgimi sammisassaqartitsivianni siulittaasoq, Josef Petersen, oqarpoq.
Inunnik isumaginnittut peqatigiiffiillu isumaqataallutik oqaluttuaraat meeqqat inusuttullu kalaallit ukioqatitik qinngasaartarlugillu malersugarisaraat, Aalborgillu Kangisissuani kalaallinik inuusuttunik marlussoriarlutik persuttaasimasut Jyllandip Avannaani Politiinit maanna aamma ujaasipput.
- Kalaallit maani najugallit ilaat inunnut ataatsimoortunut allanut naleqqiullutik inuttut pingaaruteqanngitsutut misigisimapput, Aalborgip Kangisissuani Politiit pisortaat, Claus Seerup oqarpoq.
Kalaallit Aarhusimi Gjellerup Parkimi najugallit kalaallit Aalborgip Kangisissuani najugalllit ajornartorsiutaannut assingusumik ajornartorsiuteqarlutik 2008-mi upernaakku nalunaaruteqarput.
Ajornartorsiut Aalborg Kommuniata maanna iliuuseqarfiginialerpaa, kalaallillu toqqissisimanissaat pillugu attuumassuteqartunik assigiinngitsunik novembarip ulluisa qulingiluaanni ataatsimeeqateqarniartut, Danmarkip Radioanit oqaaatigineqarpoq.
