Aalakoortut qeqertami saperngusut

Maniitsup eqqaani nunaqarfiit sapaatip akunnerata naanerani pinerluffiupput. Aallaasersortoqarpoq aammalu silarluleruttortoq umiatsiaaqqamik tillittoqarluni.
Allattoq Noah Mølgaard
februaarip 04-at 2013 09:29

Angut 28-nik ukiulik tallimanngornermi ullaakkut Kangaamiuni assortuuteernerup kingorna kamaammerujussuarpoq. Ikuallattoqarneranut kalerrisaarut aallartippaa. Tamatumalu kingorna aamma aallaat aasinnarlugu marloriarluni silaannarmut igippoq.

Qujanartumik eqqissisimasumik angut tigusarineqarpoq unioqqutitsisumillu kalerrisaarisimasutut aammalu inoqarfimmi eqqarsimasutut unnerluunneqassasoq, Qeqqani p0litiit nalunaarput.

Atammimmi Napasumilu arfininngormat inatsisinik atortitsisut aamma suliassaqarput. Tassani angutit imigassartorsimasut marluk umiatsiaaqqamik Atammimmi tillipput avannamullu Napasuliarlutik. Tassanngaanniit sila pitsaanani isikkiviluttut imarlu itinneraartupilussuaq Maniitsumut ingerlaniarsimapput.

Politiit angallataat ujaasitinneqarpoq aammalu nammineq piumassutsimik ikiuuttut arlallit umiatsiaminnik ujaaseqataallutik. Pinerluttut Napasup avannaani qeqertami ajoratik saperngusut nassaarineqarput.

Taakku tillissimasutut aammalu imigassartorsimallutik umiatsiarsimasutut unnerluunneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq