Aalajangiisoqaraluartoq suli inatsisiliortoqanngilaq
Radioaviisimiit inatsisiliorniarnermut atatillugu qulaajaanerup takutippaa, meeqqanut kanngutsaattuliorsimasut meeqqanut tunngasunik sulilersinnaaqqunagit pillagaasimanermut allagartat misissorneqartussaanerannik inatsisissaq, Inatsisartuni ukiut sisamat matuma siornali aalajangerneqareeraluartoq suli pilersinneqarsimanngitsoq. Meeqqanut kaannguttaatsuliorsimasut pillagaanermut allagartaanni erseqqissumik allassimasutigut taakkua meeqqerivinni, atuarfinni timersoqatigiinniluunniit sulisinnaannginnissaat qulakkeerneqartussaagaluarpoq.
Namminersornerullutik Oqartussat pinaveersaartitsinermut immikkoortortaqarfiata, Paarisap 1999-imili nalunaarusiaani qanoq ililluni meeqqat kannguttaatsuliorfigineqarnissaat pinaveersaartinneqarsinnaanersoq atuarneqarsinnaavoq.
Nalunaarusiami ilaatigut allassimavoq: Atorfinitsitsiniarnermi kannguttaatsuliortartut meeqqanik inuusuttuaqqanilluunniit sullitaqannginnissaat qulakkeerneqartariaqarpoq. Taamani immikkut ilisimasallit oqaatigaat kannguttaatsuliortartut meeqqerisutut, ilinniartitsisutut sungiusaasutulluunniit sulinissaat pinngitsoortinniartariaqartoq .
Paarisap nalunaarusiaa saqqummersimatsiartoq Atammimmi ujarassiuup, Victor McGregorip ukiuni 30-ni nukappiaqqanik kinguaassiuutitigut atornerluisarsimanera paasineqarpoq. Taamaakkaluartoq maanna ukiut qulit qaangiukkaluartut suli taamani innersuussutigineqartut kinguneqartinneqanngillat. Naak Inatsisartut arlaaleriarlutik innersuussutit naapertorlugit inatsisiliortoqarnissaa aalajangertareeraluaraat. Tassa Naalakkersuisut qangali inatsisiliornissaminnik piumaffigineqareernikuugaluarput.
Danmarkimi inatsisit pillugit ministeeriaqarfimmiit akornuserneqarlutik Naalakkersuisut nalunaarnerisa kingorna, ministeeriaqarfimmiit 2006-imi septembarip qaammataani kiisalu 2007-imi apriilimi ministeeriaqarfik nalunaaraluarpoq Kalaallit Nunaanni pisortat skandinaviami inatsisinut assigusumik inatsisiliorsinnaasut. Taamaakkaluartoq ulloq manna tikillugu inatsisiliortoqarnikuunngilaq.
Pia Vedel Ankersen oqarpoq, inatsisiliassaq piaarisutut illuni kinguarsarneqartuaarsimarpasittoq. Tamassumalu sunniutigisinnaasai alianartuusut.
- Soorlu uanga meerara arlaannut sukisaarsartarfimmut ilanngutsikkukku imaassinnaavoq meeqqanut kanguttaatsuliorsimasumut isumagisassanngortikkiga.
