Aalajangersakkat malinneqarnissaat tunngaviusariaqarpoq
Aktieselskabinut aalajangersakkat malinneqarnissaat Royal Greenland A/S-imut piginnittunullu, tassa Namminersornerullutik Oqartussanut, tunngaviulluinnartariaqarpoq.
Aningaasarsiornermut Naalakkersuisoq, Josef Motzfeldt, Itisiliinermi KNR-imi ungasinngitsukkut aallakaatinneqartumi taama nassuiaavoq. Naalakkersuisut Royal Greenlandillu sapaatip akunnerani qaangiuttumi aaqqiagiinngissuteqaleraluarnerat sumik pissuteqarsimasinnaanersoq Josef Motzfeldtip aallakaatitami oqaluttuaraa. Attaveqatigiinnerluttoqarsimasorli aamma tikkuarpaa.
- Ulluinnarni ingerlatsinermut qanoq attuumassuteqarnera pillugu aamma aalajangersagaqarpoq, piginnittut sinnerlugit naalakkersuisut ulluinnarni qanorluunniit oqalukkaluarpata. Aktieselskabimi siulersuisut susassaqarpata, aktieselskabinilu ulluinnarni ingerlatsisut tamatta immikkut susassaqarfeqarpugut, imaanngitsoq inatsiseqanngitsutut maleruagassaqanngitsutut immitsinnut tullaataraluta, immitsinnulluunniit tikinnata tusagassiorfiit atorlugit oqallinneq assortuunninngoriartorluni aallartikkaluartoq, inuiaqatigiit paasisimasaqartariaqassusiannut kaamattuutaanani eqqoriaaqattaanertut allaat nipeqalerluni immaqa tunngavissaqanngivissumik peqquserluttunik oqalulluni pissusilersorneq aktieselskabinngortiterisimagaanni isumaqarpunga tamakkua mianernartutut isigisariaqartut,
Aningaasarsiornermut Naalakkersuisoq, Josef Motzfeldt oqarpoq.
Royal Greenlandip Naalakkersuisullu akunnerminni attaveqatigiilluarnissaq sulissutigineqartoq, Royal Greenlandimi siulittaasup, Paaviaaraq Heilmannip Itisiliinermi aamma ilumoornerarpaa.
