Politikki

Aajuku Siumup siulersortaavi

Siumumi siulersuisuunerit nutaat Siumup nuna tamakkerlugu ataatsimeersuarnerani arfininngormat ualikkut naammassineqartumi qinigaapput, siulersuisuunernullu qinigaasut 13-it politikkikkut misilittagaqareersunik nutaanillu ilaasortaqalerput. Sermitsiaq.AG-mi taama allaaserinnittoqarpoq.

Allattoq Mads Lynge

novembarip 21-at 2011 06:42

Aleqa Hammond siulittaasutut qinigaaqqippoq, unammillerteqarani qinigaagami, ukiunilu tulliutuni pingasuni siulittaasuussalluni.

Siulittaasup tulliatut tunuartup Doris Jakobsenup Aleqa Hammond siulittaasutut issiavimmut ivertippaa. Folketingimut ilaasortanngorluni qinigaarlaap ukiuni 16-ini Siumut siulersuisuunerni sulereerluni tunuartup oqaatiginngitsoorsinnaanngilaa, Aleqa Hammond partiip siulittaasorisimasaasa siulimi Jonathan Motzfeldtip, Lars-Emil Johansenip Hans Enoksenillu suliaannik imaannaanngitsumik nangitsisussaasoq.

Lars-Emil Johansen Hans Enoksenilu ataatsimeersuarnermi ukioq manna peqataanngitsut, Sermitsiaq.AG-mi atuarneqarsinnaavoq.

Siulittaasup tullianut qinersineq pissanngatigineqarpoq, inatsisartunullu ilaasortap Karl Lyberthip, unammillertini Akitsinnguaq Olsen ajugaaffigaa.

Folketingimut qinersinermut qineqqusaartoq Vittus Qujaukitsoq, partiip siulittaasuata tulliata aappaatut unammillerteqarani qingaavoq.

Ataatsimeersuariat aqqanillit siulersuisuni inissat sisamat issiaviginiarlugit qineqqusaarput, qinigaasullu sisamat tassaapput: Jens Immanuelsen, Benjamin Kielsen, Ole Møller aamma Akitsinnguaq Olsen.

Akitsinnguaq Olsen makitsinikkut siulersuisunut ilaasortanngorpoq, Enok Sandgreenilu tamarmik 14-init taaguunneqaramik.

Aajuku Siumup siulersortaavi

Aamma atuaruk