Aaja: Saliinissamut kikkut akisussaasuunersut oqaatigiumaneqannginnerat naammaginanngilaq
Sisamanngornermi isumasioqatigiinnermi nunanut allanut tunngasunut ministeri, Kristian Jensen oqarpoq danskit atorfilittaasa sakkutooqarfiit pillugit isumaqatigiissutitoqqat misissoqqissaasallugit pisariaqartikkaat, aatsaallu tamatuma kingorna oqartoqarsinnaasoq kikkut saliinissamut akisussaasuunersut.
Misissuinissamulli atorfillit piffissaqarluarsimasut, Aaja Chemnitz Larsen oqarpoq.
Isumasioqatigiinnissamut augustilli 16-ianni aggersaasoqarpoq. Imaappoq qaammatit pingajuat affarsuaq piffissarisimavaat. Ministeriaqarfissuaq tamarmi periarfissaqarsimavoq isumaqatigiissut tamaat sukumiisumik misissorsimasinnaallugu, akisussaaffiup qanoq inissinneqarsinnaanera pillugu. Taamaattumik isumaqarpunga danskit tungaanniit suliassaq taanna pingaartinneqarsimanngitsoq.
Isumasioqatigiinnermi avatangiisinut ministerip Esben Lunde Larsenip aamma innersuussutigaa Kalaallit Nunaata avatangiisinut oqartussaaffik tigoreersimagaa.
- Isumaqarpunga akuerineqarsinnaanngilluinnartoq Kalaallit Nunaannut akisussaaffik milorujuttutut immassuk akisussaanerarlugu. Massa uani pineqartoq tassaasoq sakkutooqarnermut tunngasut Danmarkip USA-llu akornanni isumaqatigiissutaasoq, Kalaallit Nunaallu peqataatinneqarsimanani.
Aaja Chemnitz Larsen taama isumaqarpoq.
