Aaja Chemnitzip arlalinnik parteeqartumi Mette F. ministeriusussatut taperseraa
Nunatsinni folketingimut ilaasortaq, Inuit Ataqatigiinneersoq Aaja Chemnitz qinigaaqqissaguni Mette Frederiksenip ministeriunertut ingerlaqqinnissaa toqqarniarpaa.
Kisianni partiit saamerliit siammasinnerusut naalakkersuisuussapput, partiilu ataasiinnaaginnassanngitsoq, Aaja Chemnitz Sermitsiaq.AG-mut oqarpoq.
- Periarfissaq alla tassaavoq partiit saamerliit siammasinnerusut, kisianni aamma Moderatertaqarlutik, Mette Frederiksenilu ministeriunerulluni, taanna nunatsinni tusagassiorfimmut oqarpoq.
Aaja Chemnitzip kina ministeriunerulertussatut tapersersornerlugu maannakkumut oqaatigerusunnikuunngilaa – aamma naak IA-p SF suleqatigisaraluaraa partiiniillu saamerliusunit ministeriunerusussamik tapersersuisaraluartoq.
Chemnitzip ”nunatta soqutigisaanik suliaqaqqaarnissaq pingaarnerusoq erseqqissaatigaa.
Sermitsiaq.AG-p allaaserisaa naapertorlugu taassuma naalakkersuisuulersussat qulinik piumasaqaateqarfigai kiisalu Mette Frederiksen Lars Løkke Rasmussenilu marlunngornermi qinersisoqannginnerani oqaloqatigisimavai.
- Neriuppunga Mette nunatsinnut tusarnaarnerulissasoq. Qinigaaffimmi kingullermi Mette Frederiksenip nunarput paaseqatigiinnermut allagartamit isumaqatigiinniarnerup ingerlanerani ilaajunnaartissimagaa nalaappara, Aaja Chemnitz oqarpoq.
Aaja Chemnitz qinigaaqqissasoq
Qinersisartunik misissuineq Aperaa.gl-ip KNR-imut suliarisaa naapertorlugu kiap folketingimut qinigaanissaanut apeqqummut akissutit malillugit Aaja Chemnitz qinigaaffimminiiginnartussaarpasippoq.
Aamma nunatsinnit folketingimut ilaasortap aappaa, Aki-Matilda Høegh-Dam Siumumeersoq aamma qinigaaqqittussaarpasippoq. Taassuma Mette Frederiksen aamma tapersersorpaa.
AAMMA ATUARUK Ilisimatooq isumasiuineq pillugu: Siumut siuariarpoq, sulili isumannaarneqanngilaq
Nunanit avannarlernit qinikkat kingulliit marluk Savalimmiunit qinigaassapput.
Taakku ataasinngornermi qinersissutigineqariissapput. Savalimmiunimi marlunngorneq nuna tamakkerlugu eqqaaniaaffiusussaammat folketingimut qinersineq ullormik ataatsimik sioqqutsisumik ingerlanneqartussaavoq.
Danmarkimi nunatsinnilu qinersisartut taamaalillutik Folketingimut marlunngornermi qinersinnginnermi kikkut marluk Folketingimut isereernersut paaseriissavaat.
Savalimmiuni isumasiuinerit naapertorlugit partiinit Javnaðarflokkurinimit aamma Sambandsflokkurinimit qinigaasoqaqqissaaq. Taakku partiinit saamerlerneerlutillu talerperlerneersuupput.