Aasiaat Nukappiaraq qulingiluanik ukiulik ipilluni ajunaarpoq

Kalaallit Nunaanni Politiit tusagassiuutinut nalunaarummi taama allaaserisaqarput.

Politiit Ujaralimmi ajutoortoqarsimanera pillugu ippassaq ualikkut nalunaaqutaq ataatsimut kalerrinneqarput.

Politiit, ambulancit qatserisartullu ajutoortoqarfiup nalaanukartinneqarput, tassanilu ikiueqqaartoqarluni. Nukappiaraq kingorna Aasiaat napparsimmaviannukaanneqarpoq.

Nukappiararli toqusimasutut ippassaq ualikkut sisamat missaanni nalunaarutigineqarpoq.

Nukappiaqqap ilaqutai ilisimatinneqareerput.

Tatsimi Ujaralimmi alianartumik ajutoortoqarnerata malitsigisaanik ajunaartoqartoq, Kalaallit Nunaanni Politiit misissuinerisa takutippaat.

Sukumiinerusumik aamma misissuisoqassaaq, ajutoortoqarnerani qanorpiaq pisoqarsimanersoq paasiniarneqassalluni.

Meeqqat nalukkiassagaangata inersimasumik nakkutilliisussamik ilaqartarnissaat politiit ilanngullugu kajumissaarutigaat.