Pissaanermik tigumiallit 830-t ileqqorlunnginnissaat nakkutigineqassasoq
Naalagaaffiup aningaaserivinnik nakkutilliisoqarfiata Finanstilsynip allattorsimaffiliaanni qallunaat politikerit atorfilittallu 830-t sulinerminnut atatillugu akilersillutik akuerserartarsinnaasutut isigineqarlutik allattorsimaffimmi ilanngunneqarput.
Allattorsimaffimmiittut ilaatigut tassaapput, ministerit, naalakkersuisoqarfinni pisortat, eqqartuussisut, aqutsiveqarfinnilu pisortat.
Allattorsimaffinnilu folketingimi ilaasortat tamarmik ilanngunneqarput, taakkunani ilaallutik nunatsinit qinigaasimasut Aaja Chemnitz Larsen Inuit Ataqatigiinneersoq attaviitsorlu Aleqa Hammond.
AAMMA ATUARUK International måling af korruption i Grønland på trapperne
Akiliilluni peqquserlutsitsinermut pasitsaassaqarnermi allattorsimaffik pilersinneqanngilaq, inuilli sulinerminnut atatillugu akilertillutik peqquserluffigineqarsinnaasut pineqarlutik.
Allattorsimaffiullu aningaasarivinnit ikiuutaanissaa isumaavoq, inuit pissaanillit pasinarsinnaasumik akilertissimasut nakkutigineqarsinnaanngussammata.
Aningaaseriviit aningaasaqarnermillu ingerlatseqatigiiffiit allat 'inunnik politikkikkut saqqumilaartunik' taaneqartut nakkutiginissaat pisussaaffigaat. Aamma aningaasanik nuussinerit pisarsinnaasut bagmandspolitiinut (SØIK) nalunaarutigisussaavaat.
- Taamatut allattorsimaffeqarnikkut piumasaqaatit naammassinissaat aningaasaqarnermik ingerlatseqatigiiffinnut ajornannginnerulerpoq. Taamaalillutimmi sullitatik politikkikkut saqqumilaartuunersut allattorsimaffimmi takusinnaassagamikku, Stig Nielsen, Aningaasaqarnermik nakkutilliisoqarfimmi allaffimmi pisortaq dr.dk-mut taama oqarpoq.
