8. klassit Tunup Avannaanut angalapput
Bogø Efterskolemi 8. klassimi atuartunut tamanna ulluinnarsiutaanngilaq, taakkumi maanna Tunup Avannaarsuanut angalapput.
Atuaqatigiit Danmarkimi silap pissusaanut tunngasumik sammisaqallaqqinnerpaatut toqqagaanerminnut atatillugu, asimi uumaniarsinnaanermut misiliinissamik akissarsitinneqarput, ilaatigut misilissallugit qimusserneq, sermersuarmi tupermi unnuineq allanillu siornatigut misilissimanngisaannakkaminnik misiliitinneqassallutik.
Atuaqatigiit Danmarkimit aallartinnagit oqarfigineqarput, pinnersaatit, sikaritsit, oqarasuaatit angallattakkat mamakujuillu nassaqqusaanngitsut, atuaqatigiinnik nakkutilliisoq Mikael Franks aviisimut Politikenimut oqarpoq:
- Tamanna atuaqatigiit ippigissaqqooqaat. Tassami niviarsiaqqat pinnersaateqarlutik inunngorsimasut oqartoqarsinnaammat, taanna oqarpoq.
Asimi uumaniarsinnaanermut angalanerannut filmiliortunik angalaqataasoqarpoq, filmiliarineqartullu TV2-mi aggustimi aallakaatinneqassapput. Angalanerminni tv-kkut aallakaatitassiortartoq Bubber angullu Siriusikkunneersoq angalaqatigaat.
Atuaqatigiit tallimanngormat Nunatsinnut tikipput, maajillu arfernanni angerlaqqissallutik.
