72-inik ukiulik toqutsisimasutut unnerluutigineqartoq
Angummut Tasiilarmiumut 72-inik ukiulimmut, politiit naapertorlugit arnamik 29-nik ukiulimmik toqutsisimasumut unnerluussut politiit maanna piareerpaat.
Arnaq pineqartoq Tasiilami januaarip 13-iani toqutaavoq, angullu kingorna Eqqartuussisoqarfik Sermersuumit paarigallagassanngortinneqarluni.
AAMMA ATUARUK Arnamik toqutsisimanini nassuerutigigaa
KNR-ip allagaatinik takunnikkumalluni noqqaassuteqarnermigut unnerluussut Eqqartuussisoqarfik Sermersuumit pissarsiaraa. Unnerluussummi atuarneqarsinnaavoq angut 72-inik ukiulik arnamik toqutsisimasutut unnerluutigineqartoq.
Unnerluussut naapertorlugu, toqutsineq januaarip 13-iani nal. 18.40 pivoq. Angutip arnaq koorortuumik aallaasimavaa.
Angutip pinerluttuliornerminut ukiuni arfinilinni pineqaatissinneqarsimasunut inissiisarfimmiittussanngortinneqarnissaa politiit unnerluussisussaatitaasuata piumasaraa.
AAMMA ATUARUK Tasiilami angut toqutsisimasutut pasineqarpoq