60.000 koruuninnappoq

Aliikkusersuisartuni Linie 3-kunni ilaasortaq, Preben Christensen, ullumi ajugaasimaaqaaq. Assortuuteqatigisimavaa Se & Hørimi aaqqissuisuuneq, Henrik Qvortrup, taanna ulluni 20-ni akiliisitaassaaq ullormut 1000 koruunikkaarlugit.

Aviisimi qalipaatigissaartaqisumi, Se & Hørimi, allaaserisat marluk isiginnaartitsisartup akuutinneqarami iluarinagit naammagittaalliutigai. Allaaserisami siullermi qulequtsiunneqarsimavoq Nørrebro Teaterimi isiginnaartitsisartut arlallit klamydiamik tunillatsissimasut – pineqartorli tassaasimanngilaq kinguaassiuutitigut nappaat klamydia, tassaallunili puakkut aseruuttoorneq.

Preben Christensen katimmat Se & Hør aamma alapernaattunut ilaavoq, qaaqqusat fiisternerlu annikitsuinnaanngitsumik allaaseralugillu assiliisaqattaarlutik.

Københavnimi Eqqartuussivissuup Preben Christensen taperserpaa, oqarmat, allaaserisat taakku marluk narrutsatsitsisinnaasutut nalilerlugit, ulluinnarni namminneq inuttut inuunertik, allat susassarinngisaat, qaqilerlugu, inunnullu allanut ingerlateqqillugu.

Qvortrupip pillaatisinissaata saniatigut Preben Christensen 300 000 koruuninik taarsiivigineqaqqugaluarpoq, eqqartuussivimmilli aalajangiunneqarpoq 60.000 koruuninik taarsiivigineqassasoq.