UNICEF Meeqqat 59 millionit sorsunnernit ajunaarnersuarnillu eqqorneqartut
Meeqqat sorsuttoqarnera ajunaarnersuaqarneraluunniit pissutigalugu qimaasut amerliartuinnartut, Naalagaaffiit Peqatigiit meeqqanut suliniaqatigiiffiata Unicefip nalunaarusiaata takutippaa, ukiut qulikkaat pingasut kingulliit ingerlaneranni aatsaat taama amerlatigalutik.
Meeqqat ikiorserneqarnissaminnut pisariaqartitsisut maanna amerlaqisut nalunaarusiami tikkuarneqarpoq, Unicef Danmarkip qullersaa Karen Hækkerup taama oqarpoq.
- Meeqqat nunarsuarmi sisamararterutaasa missaat nunami sorsuffiusumi ajunaarnersuaqarfiusumiluunniit ullumi inuusut takusinnaavarput. Meeqqat aatsaat taama amerlatigisut ikiorneqarnissaminnut pisariaqartitsisut, Unicef tamanna pillugu ukiut 30-t kingulliit matuma siornatigut nalunaarsuisalermalli meeqqat ikiorneqarnissamik pisariaqartitsisut aatsaat taama amerlatigipput, Karen Hækkerup oqarpoq.
Meeqqat 59 millionit, nunanit 64-ineersut, ikiorneqarnissaminnik aappaagu pisariaqartitsissapput, imermik minguitsumik, nerisassanik, nakorsanit ikiorneqarnissamik, illersorneqarnissamik atuarsinnaanissamillu pisariaqartitsissallutik.
Aningaasat tamakku iluarsiiviginiarlugit pisariaqartinneqartut tassaapput 4,2 milliardit dollarit, tassa 28 milliardit koruunit missaat.