Politiit ullormut nalunaarutaat: 59-inik ukiulik Maniitsumeersoq suli ujaarineqarpoq
Halfdan Jensen 59-inik ukiulik Maniitsumi angerlarsimaffimminit suli periarfeerunneqartoq, Kalaallit Nunaanni Politiini pigaartut pisortaat Poul Kreutzmann oqarpoq.
- Angummik taassuminnga ujaasinerput ullumikkut nangeqqissavarput, pigaartut pisortaat oqarpoq.
Angut ataasinngornermi ullaakkut nalunaaqutaq arfernup qeqqali takuneqarsimanngitsoq pillugu ilisimasaqartoqarpat politiinut attaveqartoqartariaqartoq, ippassaq pigaartut pisortaat kaammattuivoq.
Kalaallit Nunaanni Politiit oqarasuaataannut 70 14 48-mut sianersinnaavutit.
Pisut imigassamut aalakoornartulimmut attuumassuteqartut arlallit
Aammattaaq ullormi kingullermi imigassamut aalakoornartulimmut attuumassuteqartunik arlalinnik pisoqarsimasoq, pigaartut pisortaat oqaluttuarpoq.
Ilaatigut angut inuusuttuaraq 18-it inorlugit ukiulik marlunngornermi ullaakkut nalunaaqutaq qulingiluap qeqqariartortoq Nuummi ajoqusersimasut nakorsiartarfianni eqqissiviilliortitsisimanera pissutigalugu politiinit tigummigallarneqarpoq.
- Inuusuttuaqqap ajoqusersimasut nakorsiartarfianni sulisut politiillu nakuuserfigai, utoqqaassusialu pissutigalugu isumaginninnermut oqartussaasut aamma nalunaarfigineqarput, Poul Kreutzmann oqarpoq.
Tamatuma saniatigut inuit aalakoortut arlallit marlunngornermi Nuussuarmi Akikip eqqaani eqqissiviilliortitsipput, inuillu ilaat ataaseq unnuap qeqqata kinguninngua imigassartorsimatilluni biilinik ingerlatsisimasutut unitsinneqarpoq.
- Biilertoq imigassartorsimatilluni biilinik ingerlatsisimasutut biilinillu ingerlatsisinnaanermut allagartaqarnani biilersimasutut unnerluutigineqassaaq. Tamatuma saniatigut ilaasoq imigassartorsimatilluni biilinik ingerlatsisumut biilertitsisimasutut akiligassinneqassaaq, Poul Kreutzmann oqarpoq.
Nuummi aqqusinermi ajutoorneq tillinniarnerlu
Ippassaq ualikkut aqqusinermi angallannermi ajutoortoqarsimasoq ajoqusertoqarsimasorlu politiit nalunaarfigineqarsimasut, pigaartut pisortaat oqaluttuarpoq.
- Biilit marluk Inspektionsbakkenip H.J. Rinksvejillu akornanni aporput. Arnaq nakkutigineqarniassammat napparsimmaviliaanneqarpoq, qujanartumilli ajoqusersimanngilaq, Poul Kreutzmann oqarpoq.
Minnerunngitsumillu pingasunngornermi ullaaralaakkut Nuummi tillinniartut marluk 18-inik ukiullit tigusarineqartut pigaartut pisortaata eqqaavaa.
- Sumiiffimmit qimaariaraluarput, politiilli qimmiisa ilaata unitsippai, eqqartuussivimmilu eqqartuunneqarumaarput, Poul Kreutzmann oqarpoq.
