54-inik ukiulik qaammatini arlalinni maqaasineqartoq toqungasoq nassaarineqartoq
Hans Frederik Egede Mathæussen siorna novembarimili maqaasineqartoq, toqungasoq nassaarineqartoq, Københavnimi politiit ilisimatitsipput
Toquneranik arlaannik pasinartumik takussutissaqanngitsoq, politiit ilisimatitsissutigaat.
Allattoq Marie Kûitse, Mads Malik Fuglsang Holm
apriilip 08-at 2023 12:13
Angut kalaaleq Københavnip ilaanni Amagerimi apriilip tallimaanni unnuakkut toqungasoq nassaarineqarsimasoq Københavnimi politiinut nalunaarutigineqarpoq. Politiit sumiiffimmut apuummata angutip timaa, 54-inik ukiulik Iigitimik taaguutilik, Hans Frederik Egede Mathæusseniusoq paasineqarpoq.
Arlaannik pasinartumik toqusineranik takussutissaqanngitsoq, politiit ilanngullugu ilisimatitsissutigaat.
Hans Frederik Egede Mathæussen siorna novembarimili maqaasineqalerpoq, taamani ilaqutaasa sapaatit akunnera ataaseq tusarfigisimanagu maqaasillugu nalunaarutigaat. Kingorna politiit ujaasinermik annertuumik aallartitsipput, nassaarfiunngitsumilli.
