49-nik ukiulik panissiaminik atornerluisarsimasoq tigusarineqarpoq
Pinerliisarnerit ukiut pingasut missaanni pisarsimapput, niviarsiarlu nammineerluni isumaginnittunut saaffiginnissimavoq, atornerlunneqartarnini ilisimatitsissutigalugu.
Paamiuni politiip, Iver Krogh-ip, niviarsiaq nukissaqarsimanera pillugu nersorpaa.
-Niviarsiap atugai eqqarsaatigeriakkit. Atornerlunneqarneq ilungersunartorujussuuvoq, allaavorlu niviarsiaq ersissuteqartoq ilisimasaqarsinnaanngimmat siunissani qanoq issanersoq, ilaqutariittut inuuneq allanngorujussuarsimammat.
-Tamanna nukissamik sapiillisaarnermillu pisariaqartitsivoq, Paamiuni politeeq AG-mut oqarpoq.
Niviarsiaq Paamiut Kommuneanit ikiorneqalerpoq, assigiinngitsutigut tapersersorneqassalluni.