3G illoqarfinni tamani atorneqarsinnaalerpoq
Atuisunut iluaqutissartarissavaa illoqarfimmi sorlermiikkaluarunilluunniit qarasaasiat oqarasuaatillu angallattakkat atorlugit inuit attaveqaqatigiiffiinut, nutaarsiassanut e-mailiminnullu attaveqaannarsinnaassammata.
TELE-POST-ittaaq atuisut kissaateqarnerat naammassiniarlugu naammassisaqarsinnaassutsip annertusarnissaa sulissutiginiarpaa:
- 3G Nunatsinni eqqunneqarmalli nioqqutivut ingerlaavartumik ineriartortissimavagut, decembarimilu alloriarnerit tullissaat tassaassaaq Nuummi 4G-mik atuutilersitsinissarput, tusagassiorfinnut nalunaarummi oqaatigineqarpoq.
Atuinerup annertusiartornera aamma akit appartinnissaannut periarfissiivoq.
3G-p eqqunneqarneraniilli akit appariartuinnarsimapput, TELE-POST-illu mobilt bredbåndimut akigititat piffissami qanittumi 40 - 60 %-inik apparteqqinnissaannik pilersaateqarpoq, Nalunaarasuartaateqarnermilu aqutsisoqarfimmit akuerineqarnissani maanna utaqqiinnarlugu. Mobilt bredbånd qarasaasiaaqqani qarasaasianilu nalinginnaasuni sim-kortilerluni donglelilerluniluunniit atorneqarsinnaavoq, ullumikkumiillu tassa nunarput tamakkerlugu illoqarfinni tamani atorneqarsinnaanngorluni.
