3D-mut isarussat pillugit mianersoqqusisalissapput
- Isarussat taakku seqinersiutaannginnerat seqinermullu illersuuteqannginnerat isiginnaarianut erseqqissaatigisalissavarput, aaqqissuussinermut pisortaq Ove Heilmann oqarpoq.
Kisianni isarussat silami atorneqannginnissaat qulakkiissallugu Katuap pisussaaffiginngikkaa Ove Heilmannip ilanngullugu erseqqissaatigaa.
- Suliagut naammaginartumik naammassisarpavut, kisianni illoqarfimmi misissuisartutut angalaarsinnaanngilagut inuit seqinersiutit sorliit atorneraat misissorlugit, Ove Heilmann oqarpoq.
3D-mut isarussat silami atoqqusaannginnerat pillugu paasissutissat aallaqqaammut puuanni allaqqasalissasut Ove Heilmannip oqaatigaa.
- Tassa isarussat seqernup qinngorneranut uloriartunut illersuuteqannginnerat oqaluttuarissavarput, Ove Heilmann oqarpoq.
Danmarkimi filmertarfiit ilaanni isiginnaariat isarussat atoreeraangamikkit utertittarpaat, kisianni Katuaq taama iliornianngilaq. Nunatsinnimi isiginnaariat isarussat namminneq pigilertarpaat, aamma utertinneqarnissaat pilersaarutigineqanngilaq.
- 3D-mut isarussat errortakkat atoqqittakkallu Danmarkimi filmertarfinni atorneqartarput. Kisiani uagut systemi pisiarinikuusarput allaanerummat filmeriat isarussat atukkatik namminneq pigilertarpaat. Kisiannili paarilluarsimagunikkit tullissaanut atoqqissinnaasarpaat, Ove Heilmann oqarpoq.
3D-mit filmiliat arlaqartut Katuami ullæuni tulliuttuni takuneqarsinnaassapput, soorlu Harry Potter kingullerpaaq, Orla Frøsnapper, Avatar, Priest aammalu Tron Legacy.