37-nik ukiulik ikuallatsitsisartoq

Angut 37-nik ukiulik Ilulissaneersoq Holbækimi Sjællandimiittumi ikuallatsitsisimasutut inatsisit sakkortunerpaartaannik ullumi eqqartuunneqarpoq, piffissaligaanngitsumillu parnaarunneqartussanngorluni. Angut taanna aappassaanik ikuallatsitsisimasutut eqqartuunneqarpoq.
marsip 07-at 2008 06:22

Angut 1988-imi17-nik ukioqarluni Ilulissani toqutsilluni ikuallatitsisimasutut aamma eqqartuunneqarpoq, tamannalu Nykøbingimi piffissaligaanngitsumik parnaarussaassutigalugu. Ukiut arfineq-pingasut matuma siorna angut iluatsilluarmat parnaarussivimmiit anisinneqaraluarpoq, aniguisinneqaraluarnerali aamma kinguneqarnerluppoq. Tassami ukioq kingulleq februaarimi taamanikkut ineqarfigisani ikuallappaa. Imerniartarfillu Korsør-imiittoq aamma ikuallallugu, apriilimilu 2007-mi ajorluinnartumik pisoqarpoq tassami Nykøbing Sjællandimiittoq neriniartarfik aamma ikuallammagu.

Tamannarpiarlu tunngavigalugu sakkortunerpaamik angut maanna pillarneqarpoq, naak ikuallatitsinermi inunnik ajunaartoqanngikkaluartoq ikuallattoqarnerani misissuisartut naliliinerat naapertorlugu ikuallatitsineq ima navianarsimatigaaq allaat inuup inuuneranik naleqarataannaasimalluni.

Nutaarsiassaqartitsiviup TV2 ØST-ip tusarliussai naapertorlugit angut pinerluttutut navianaateqarluinnartutut isigineqarluni parnaarussivimmut isumannaannerpaamut inissinneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq