300-jut efterskolernissamut itigartitaapput
Ukiormannalu naammassillutik soraarummeertut
siornatigut naammassisartunut sanilliullugit marloriaammik amerlatigipput. Tamanna 11.klasse-p atorunnaarsinnerarneranik tunngaveqarpoq.
Naammassisut arlaqartut efterskolernissaminnut tapiiffigeqqullutik qinnuteqartut itigartitaasimapput, tassami qinnuteqartunit 743-iusuni 40 procentit itigartitaasimasut, KIIN-imut paasiniaanerup takutippaa.
Itigartitaasut amerlanerit Sulisartut Højskoliannut efterskolernissamik qinnuteqartuupput. Efterskole atuartunut 80-inut inissaqartitsivoq, ukiormannalu qinnuteqartut 320-iusimapput , tassa qinnuteqartut sisamaangaangata ataaseq kisimi iluatsisisarluni.
Atuartunit nuna takakkerlugu naammassisunit 441-ut Danmarkimi efterskolernissamut qinnuteqarput, taakkunanngalu 368-it iluatsitsipput 73-illu itigartinneqarlutik.