Nunat 30-t naatitassarpassuarnik naatitassanik toqqorsivimmut toqqorsisut
Nunat 30-t nunat tamalaat naatitassanik Svalbardimi toqqorsivianni ataatsimeeqqammerput, tassungalu atatillugu naatitassanik aamma toqqorsivimmut toqqorsillutik. Nutaarsiassaqartitsivik Ritzau taama allaaserisaqarpoq.
Naatitassat pillugit Svalbardimi ataatsimiinnermi peqataasut ilaat tassaapput Norgep statsministeria Erna Solberg, Ghanallu præsidentia Nana Akufo-Addo. Taakku Naalagaaffiit Peqatigiit ataanni inissisimasumi ataatsimiititaliami siulittaasuupput.
Nunat peqataasut 30-t naatitassanik toqqorsivissuarmut ilanngussaqartut akornanni annertunerpaamik ilanngussaqassapput. Naatitassanik toqqorsivik 2008-mi ammarneqarpoq.
Naatitassanik toqqorsivik nunarsuarmiunut pingaaruteqartoq
- Nunarsuarmi naatitat sapinngisamik assigiinngisitaartuunissaat qulakkiissagutsigu toqqorsiveqarnissarput pingaaruteqarpoq, naatitammi ataatsimut isigalugit ikiliartorput, Norgep statsministeria Erna Solberg oqalugiarami ilaatigut oqarpoq.
Naatitassanik toqqorsivik "Global Seed Vault" qerititsivissuaavoq, assersuutigalugulu atomimik qaartartorsuarnik aserorneqarsinnaajunnaarsinneqarnikuulluni, nunalu sajussagaluarpat silalluunniit pissusiata allanngoriartorneranit sunnerneqarsinnaajunnaarsinneqarnikuulluni.
Naatitassanik toqqorsivik naasussanik naatitassannillu nunarsuarmiut piunerannut tunngaviusunik peqqumaasiviuvoq.
Naatitassanik toqqorsivimmi isumannaallisaaneq annertusarneqartoq
Naatitassat millionilikkaat, naatitanit assigiinngitsunit 5000-init pisut "Global Seed Vault"-imi toqqortaatigineqarput, soorlu qajuusiassat, majsi, qaqorteqqasussat, suaasiassat, naatsiiallu nunarsuarmi tamarmeersut toqqortaatigineqarlutik.
Toqqorsiviup isaariaatigut immakkiartornera pissutaalluni isaariaq 200 millionit koruunit nalinginut 2018-imi aserfallatsaaliorneqarpoq. Norgemi tv-qarfik NRK taama allappoq.
Aserfallatsaaliinermut atatillugu isumannaallisaaneq aamma annertusarneqarpoq. Ataatsimiinnermi peqataasut tamanna pillugu toqqorsivimmut isersinnaatitaanngillat.
Toqqorsivimmi sulisut tamaallaat isersinnaatitaasut, NRK allappoq.
