24.000-t Japanimi ajunaarsimassangatinneqarput

Japanimi sapaatip akunneri marluk matuma siorna nunap sajorujussuarnerata kingorna tassaarsuarmat, Fukushimami nukissiorfimmiit qinngornerit ulorianartut ilaatigut pissutigalugit nunap ilarujussua tikinneqarsinnaasimanngilaq. Danmarks radiop ilanngutassiortua Søren Bendixen oqaluttuarpoq, isigisinnaasani tamarmi tupinnaannartumik aseruatitersimasoq - biilit ikuallannikut illullu sequmissimasut sumi tamaani takussaapput. Maaniinnaq sissap timmut ungaseqisaani umiarsuaq soorlu kraanerujussuarmik tamaannga inissinneqarsimalluni napavoq. Ajunaarnersuartut tulleriittut pingasutut oqaatigineqarsinnaasut - tassa nuna sajorujussuareermat, tassaarsuareermallu ulluni arlalinni suut tamarmit ikuallannerannit aseruititernerit akornatigut aqqusinniortoqarsimavoq.
Ikiuiniartut ajunaarsimasunik ujarlertut takussaapput, inuillu tamaani najugaqarsimasut pigisaminnik ujarleraluarlutik.
Inuit 520-t Kiesenomami ajunaarsimasutut nalunaarsorneqarsimapput. Illoqarfimmili najugaqarsimasut 74.000-it ilaat 20.000-it suli sumiissusersineqanngillat.
Søren Bendixenip DR-imeersup oqarneratut; soorlu qunnermut piinnarluni. Japanimi ajunaarsimasutut nalunaarutigineqartut maanna 24.000-it sinnerpai, amerlanerujussuunissaalli suli annilaanngatigineqarpoq.
Ajunaarnersuaqarnerani aseruinerit 1600 miliarti koruuninik naleqarnissaat naalakkersuisut naatsorsuutigaat.