24-nik inualik

Meeqqat assammikkut isikkamikkullu immikkut ittumik inuaqarlutik inunngortartut takornartaanngillat. Taamaattorli isikkani assannilu tamani immikkut ittumik inuaqartoqartarnera nalinginnaanngilaq.

Napparsimmavimmi St. Lukemi sulisut nukappiarannguaq Kamani Hubbard inunngormat eqqumiiginarsinnaasumik malugisaqanngillat. Nukappiarannguup angutaa ernermini eqqumiigisaqalerluni malussaqqaartuuvoq.

Taama pisoqartarnera arlalinnik inuaqartarnermik taaneqartarpoq, tamannalu kingornuttagaavoq, tamannalumi ataataasup ilaqutaani takornartanngilaq.

- Ilaquttama ilaat arfinilinnik inuaqarput, isikkakkulli arfinilinnik inualimmik aatsaat takuvunga, ataataasoq BBC-mut oqarpoq.

Napparsimmavimmi tassani meeqqat nakorsaat Michael Treece eqqissisaalluni ima oqarpoq:

- Tamanna ernummatissaanngilaq, tassaaginnarlunili allannguallanneq soqutiginartoq kusanartorlu. Eqqarsaatigeriarsiuk aqqaneq-marlunnik inualik qanoq pattallaqqitsigilersinnaassanersoq – imaluunniit qanoq kitaarillaqqitsigilersinnaassanersoq!