Ukrainemi saassussisoqarnerani inuit 23-t toqutaasut

Ukrainimi illoqarfik Zaporizjzja, russinit tiguaqqaneqartoq qaartartumik igeriuttakamik tallimanngornemi saassunneqarmat inuit 23-t toqutaapput 28-llu ikiligaallutik.

Nunap immikkoortuani Zaporizjzjami guvernøri Oleksandr Starukh taama oqaluttuarpoq.

Saassussisoqarmat sakkutuujunngitsut biilii arlaqartut eqqorneqarput.

Inuit toqungasut nunamiittut biiliniluunniit eqqorneqarsimasuniittunik takusimalluni, qaartartumeerisoqarnerani takunnittoq nutaarsiassaqartitsivimmi Reutersimeersoq oqaluttuarpoq.

Qaartumeerineq sakkortungaarmat, biilit amerlasuut igalaavi aseruatiterput.

Ruslandi qartartumeerisuunerarlugu Ukrainemit pisuutinneqarpoq.

Rusland maanna qaammatini arfineq marlunngulersuni Ukrainemut saassussinermini sakkutuujunngitsunut saassussisarmannginnerarpoq tamannalu arlaleriarlugu oqaatigisarlugu.

AAMMA ATUARUK Russit: Ukrainemi qimuttuitsut unittarfiat saassupparput

Zaporizjzjami atorfilittap russinik illersuisup Ukraine saassussisuunerarlugu oqarpoq.

Ukrainemi nunap immikkoortua Zaporizjzja, nunap immikkoortui sisamaasut ilagaat russit sakkutuuinit tiguaqqaneqarlutillu nakkutigisaasut.

Ukrainemi nunap immikkoortui Zaporizjzja, Luhansk, Donetsk aamma Kherson, Ruslandimut ilannguneri russit præsidentiata Vladimir Putinip ullumikkut pisortatigoortumik uppernarsarpaa.

Tamanna pivoq Ukrainemi nunap immikkoortuini sisamani sapaatit akunnerata ingerlanerani innuttaasunik taasisitsisoqareersorlu. Taasisitsisoqarnerani Ruslandimut atalernissaq taasissutigineqarpoq.

Innuttaasunik taasisitsineq nunallu immikkoortuisa Ruslandimut ilanngunneqarnissaat nunani killernit, Danmark ilanngullugu, assuarineqarpoq.