Angut 22-nik ukiulik Maniitsumi marlunnik toqutsisimasutut tigummigallagassanngortinneqartoq

Qeqqata Eqqartuussiveqarfiata angut 22-nik ukiulik marlunnik toqutsisoqarneranut atatillugu pingasunngornermi tigusarineqartoq tigummigallagassanngortinneqassasoq aalajangerpaa.

Politiit taama paasissutissiipput.

Angut 22-nik ukiulik aallaqqaasiutigalugu ulluni 28-ni tigummigallagassanngortinneqarpoq. Tamatuma kingorna eqqartuussisup politiit misissuinerannut inuilluunniit allat isumannaannissaannut angut navianartuuppat tigummigallarneqarneranik sivitsuinissaq aalajangersinnaavaa.

AAMMA ATUARUK Angut 22-nik ukiulik marlunnik toqutsisutut pasineqartoq tigusarineqartoq

Pingasunngornerup unnuaani toqutaasut marluk tassaapput – angut 60-it sinnerlugit ukioqartoq arnarlu 50-it aallartinneranni ukioqartoq.

Maniitsumi inuit marluk toqungasut najukkami nassaarineqarsimasut pingasunngornerup unnuaani innuttaasup nalunaarutigineqarpoq.

Politiit najukkamut ornigupput, tassanilu inuit marluk savimmik toqunneqarsimasut paasivaat.

Toqutsisoqarneranut suliamik misissuisoqaleruttorpoq, Nuumminngaanniit politiinik Maniitsumi ikiuiartorput, tamatuma saniatigut Naalagaaffiup politiivinit pinerluttoqarsimatillugu misissuisartut suliamut aamma ikiuutissapput.