21-nik ukiulik toqutseriarsimasutut pasineqarpoq
Angut 21-nik ukiulik Paamiuni Imarsiornermik Ilinniarfimmi ilinniartoqatiminik angummik 21-nik ukiulimmik toqutseriarsimasutut arfininngormat tigusarineqarpoq.
Allattoq Mads Lynge
Angut tigusarineqartoq toqutseriarsimasutut pasineqarluni februaarip ulluisa 26-ata tungaanut tigummigallarneqarpoq.
Ilinniartut taakku marluk arfininngornermi ualikkut nalunaaqutaq tallimat missaanni akunnerminni aaqqiagiinngissuteqalersimapput.
Angut qungatsimigut savimmik kapineqarpoq, inuunerali navianartorsiunngitsoq, Paamiuni politiit pisortaat Christer Nielsen oqarpoq, suliarlu suli ingerlanneqarmat annertunerusumik oqaaseqarsinnaannginnerarluni.