TELE-POST Nipitittakkat nutaat 24-t 2019-imi saqqummissapput

Kalaallit allakkanut nipitittagaat mikisuupput, taamaakkaluartoq nunatsinni kulturitsinnut immikkuullarissumut, pinngortitamut oqaluttuarisaanermullu tulluusimaarutaasumik 1938-milu saqqummersittalerparput ulloq manna tikillugu, Tele Postip ukiumi nutaami nipitittakkanik nutaanik saqqummiinissaminut atatillugu taama allappoq.

Nipitittakkat tuniniarneranni ilassutinit isertinneqartut nunatsinniittumut Frelsens Hærimut tunniunneqassapput.

Eqqumiitsuliortoq Maria Panínnguak´ Kjærulff nipitittakkamik pilersitsisuuvoq.

Nunatsinni namminersorluni oqartussaanerup eqqunneranit ukiut qulinngornerat nipitittakkamik kusanarluinnartumik malunnartinneqarumaarpoq, Aka Høeghimit titartarneqarsimasoq. Nipitittagaq inuiattut ullorsiornitsinni saqqummersinneqassaaq.

TELE-POST Nunatsinni sumiiffiit marluk Unescomit eriagiassanngortitaanerat malunnartinniarlugu nipitittakkanik marloriarluni saqqummersitsereerpoq. Taamatuttaarlu Aasivissuit-Nipisat tassunga ilanngutsinneqarnerat soorunalimi nipitittakkamik nutaamik pilersitsinikkut malunnartinneqarumaarpoq. Nipitittagaq kusanaqisoq Julie Edel Hardenbergimit pilersinneqartoq aamma juunip ulluisa 21-anni saqqummersinneqassaaq.

Ukiup naalerneranittaaq nipitittakkat marluk saqqummersinneqassapput.