2018-imut aningaasanut inatsisissatut siunnersuut aappassaaneerneqalersoq
Naalakkersuisut aappassaaneerinninnissamut allannguutissatut siunnersuutit 90-it saqqummiuppaat, aningaasanullu inatsisissatut siunnersuut 2018-imut 8,6 millionit koruuninik maanna amigartooruteqarfiusussanngorpoq ukiunilu tullerni sisamani katillugit 27,8 millionit koruuninik amigartooruteqarfisussanngorluni.
Allannguutit annerit ilagaat aalisarnermit isertitassatut naatsorsuutigineqartut ikilineqarnerat, raajanut tunngatillugu 10 millionit koruuninik qaleralinnullu tunngatillugu 5 millionit koruuninik ikilineqarput.
Tamanna ilaatigut Qeqertarsuup tunuani qaleralinnik pisat ikiliartupiloornerannik pissuteqarput, avataasiorlunili qaleralinniarneq ingerlalluarneruvoq, tamatumunngalu tunngatillugu isertitassatut naatsorsuutigineqartut amerlineqarput.
Naalakkersuisut nuna tamakkerlugu innaallagissamut imermullu assigiimmik akeqartitsinissamik siunnersuutaat allannguutissatut siunnersuutigineqartuni aamma ilaavoq.
Allannguutit Inatsisartut aningaasaqarnermut akileraartarnermullu ataatsimiititaliaanni suliarineqarput ataatsimiititaliallu allannguutit pingaarnerit tamaasa akuersissutigineqarnissaat inassutigai.
Aningaasanut inatsisissatut siunnersuut maanna aappassaaneerneqaraluartoq pingajussaaneerneqarnissaanut arlalinnik aamma allannguuteqarsinnaavoq, siunnersuutit arlallit ilanngullugit suli naatsorsuisoqarsimanngimmat.
Taakku ilagaat Inatsisartut siulittaasoqarfiata partiinut tapiissutit 30 procentinik ilaneqarnissaannik siunnersuutaa. Tamanna ukiumut 2 millionit koruuninik aningaasartuutaassaaq.
Tamanna pereerpat, inuit innarluutillit tapersiivigineqartarnerat pillugu inatsisartut inatsisissaattut siunnersuut siullermeerneqassaaq.
Siunnersuut Naalagaaffiit Peqatigiit innarluutillit pillugit nunani tamalaani isumaqatigiissutaannik Nunatta peqataaffigisaanik tunngaveqarpoq, siunnersuullu akuersissutigineqassappat 2019-imit 2021 ilanngullugu 75 millionit koruunit missaannik aningaasartuuteqarfiussaaq.
