2014-imi qaammatikkuutaartumik pisassiissutit saqqummiunneqarput
Umiarsiaararsorlutik qaleralinniat ukiortaami qanoq pisassaqartinneqassanerlutik paaseqammerpaat. Qaammatikkuutaartumik pisassiissuteqartarneq aalisartunit nuannarineqarpallaanngilaq, avannaanili aalisakkerivinni sulisut aalajangersimasumik suliffeqarnissaminnut periarfissagissaarnerulissapput.
Allattoq Peter Troelsen, Simon Uldum
decembarip 20-at 2013 07:17
Ukiup qanoq ilinera apeqqutaatillugu qaammatikkuutaartumik pisassiissuteqartoqartassaaq, aasaanersoq ukiuunersorluunniit apeqqutaatillugu pisassiissutigineqartut assigiinngitsuusassallutik.
Ukiuunerani, januaarimi, marsimi oktobarimilu Upernavimmut pisassiissutigineqartut 310 tonsiussapput, Uummannamut 387 tonsit Qeqertarsuullu tunuanut 292 tonsiussallutik.
Aasaanerani, apriilimit septembarimut, Upernavimmut pisassiissutigineqartut 465 tonsiussapput, Uummannamut 573 tonsit Qeqertarsuullu tunuanut 438 tonsiussallutik .
Qaammatikkuutaartumik pisassiissutaasut tamakkerneqaraangata aalisarneq unittassaaq, pisassiissutillu nungunneqarsimanngikkaangata sinneruttut qaammatip tullianut nuunneqartassapput.
