2009-mi Kitaani raajartassat 10 procentimik ikilineqartut
Tunumi raajartassiissutit allanngortinneqaratik 12.400 tonsiussapput.
Kitaani 2009-mi raajartassat ukiormannamut naleqqiullugit 10 procentimik ikileriartinneqarput, tassa ukiormanna pisassiissutigineqaramik 127.300 tonsit, 2009-milu pisassiissutigineqarlutik 114.570 tonsit, taakkununnga ilaallutik EU-mut pisassiissutigineqartut 4.000 tonsiusut.
Kitaani pisassiissutigineqartartut 90-ikkut naalernerannili qaffariartorusaarsimapput, taamalu 2004-mi 2005-imilu amerlanerpaallutik. Ukiormannalu uumassusilerituut innersuussutaat allanngorani 110.000 tonsiuvoq, ikinnerulaarsinnaanerat innersuussutigineqarluni.
Taamatut innersuussuteqarneq tunngavigalugu naalakkersuisut pisassiissutinik ikililerinissaq aalajangiuppaat, pisassiissutillu ukiuni tulliuttuni ikileriartinneqartarnissaat siunnerfiuvoq, tamatumalu kingorna uumassusilerituut innersuussutaat aamma pisassiissutigineqartut imminnut naapertuutilernissaat anguniarneqarluni.
Kitaani raajarniarneq sinerissamut qanittumi avataasiorlunilu ingerlanneqarpoq. Inatsisartut aalisarneq pillugu inatsisaanni paragraf 5 immikkoortoq 3 najoqqutaralugu Kitaani raajarniarnermi pisassiissutigineqartut 57 procentii avataasiortunut pisassiissutigineqassapput 43 procentiilu sinerissamut qanittumi raajarnianut pisassiissutigineqassallutik.
