2008-mi pinerluttuliornerit: Politiit nukappiaqqamik aallaanninnerat
Nukappiaqqat 14-inik ukiullit marluk nunaqarfimmi Ilulissat eqqaanniittumi, juunip 13-anni umiatsiamik aallaasinillu tilleriarlutik aallarput eqqarlutillu. Nukappiaqqat politiinit peqquneqarput aallaasitik tunniutissagaat, tamannali naalanneqanngilaq.
- Politiit piumasartik naalanneqanngimmat qunusaarillutik immamut seqqoqattaarput, pisup ilungersunarneranik nukappiaqqat paasitikkumallugit.
Nukappiaqqap aappaata aallaat politiit tungaannut saatippaa aallaaniarlugillu qunusaarlugit. Arlaleriarluni taamaaliorpoq, qularnanngitsumik politiit inuunerat ulorianartorsiortinneqarluni, Steen Silberg Thomsen oqaluttuarpoq.
Nukappiaqqat marluk taakkua umiatsiamik Ilulissanukarput, sissamullu talikkamik niullutik. Ilulissani politiit ikiortaat marluk sissami utaqqipput, nukappiaqqat tigusarissallugit piareeqqallutik. Politiit sissamiitillutik nukappiaqqanit nilliaffigineqarput, aappaata aallaat suli tigummigaa.
- Nukappiaqqat tunniutiinnarnissaannik politiit piumasaqanerat tusaaneqanngimmat, politiit qunusaarillutik aallaasiminnik seqqorput, taakkuali nukappiaqqanit qisuariarfigineqanngimmata, allatut ajornartumik, nukappiaqqap aappaa aallaammik tigumiartoq, niuatigut illuttut politiinit aallaaneqarpoq, Steen Silberg Thomsen oqaluttuarpoq.
Juunip 13-anni aallaasersorneq pillugu suliaq naammassineqareerpoq. Nukappiaqqat taakkua marluk 14-inik ukiullit eqqartuussisunut sassartinneqarsinnaanngillat, ukiukippallaarnertik pissutigalugu pineqaatissinneqarsinnaannginnamik.
Politiit inuunerminnik ulorianartorsiortitaasimapput nukappiaqqanullu taakkununnga qunusaarillutik aallaasersortariaqarsimanerat pissusissamisoorsimasoq naliliisoqarpoq.
