2008-mi Nunavummi Inatsisartunut qinersisoqassagunarpoq
Taamaalilluni Nunavummi qinersisartut pingajussaa inatsisartussaminnik qinersisussanngussapput.
Taamatut ilimasaarigaluarluni Nunavummi naalakkersuisut siulittaasuata oqaatigisinnaannginnerarpaa qaqugorpiaq qinersisartut inatsisartussaminnik qinersissanersut, soorluttaaq qinigassanngortissanerluni oqaatiginianngikkaa.
Nunavummi naalakkersuisut qinigaaffiup februarimi 2009-mi naanissaata tungaanut suliassaqaqaat, Paul Okalik oqarpoq.
Nunavummi naalakkersuisut siulittaasuata ilinniartitaaneq ilinniartitseqqinnerlu anguniagassatut pingaaruteqartutut oqaatigai soorlu aamma nunaqarfinni innuttaasut sullinneqarnerisa pitsanngortinnissaa oqaatigigaa.
Ukiumut qaangiutilersumut oqaaseqassanersoq aperineqarami Paul Okalik oqarpoq ukioq pikkunarsimaqisoq. Junimi Paul Okalik nutaarsiassaqartitsivinni eqqartorneqaqaaq Lynda Gunn Nunavummi Kommunit kattuffianni sulisoq pillugu kusagineqanngivissunik oqaaseqarami.
Piffissami qaninnerusumi Nunavummi naalakkersuisut kukkunersiuisartumit avoqqaarineqaqaat, tassa Nunavut Business Credit Corporation-imik suleqateqarnerminni, inuussutissarsiornermi pisortaqarfimmik aningaasatigut aqutsinerlunnerarneqarnertik patsisigalugu.
Avoqqaarinninnerup kinguneraa aningaasaqarnermut naalakkersuisup David Simailak-ip tunuartariaqarnera.
Qaangerniagassat pikkunarsimagaluartut Okalik isumaqarpoq 2007 Nunavummi aningaasarsiornermut ajunngitsuusimasoq, tassami aatsitassarsiornermut aningaasaliissutit aatsaat taamak amerlatigisimapput.
Pisut kingulliit ilanngukkaanni Nunavummi aningaasarsiorneq procentinik arfinilinnik pitsanngoriaateqarsimavoq, taamaalillutalu nunap sinnerani pisunut malinnaasutut taaneqarsinnaalluta, Nunavummi naalakkersuisut siulittaasuat Paul Okalik oqarpoq, nangillunilu Nunavummi oqaatsit pillugit illersuiniarneq inatsisiliornikkut iluatsittutut taaneqarsinnaasoq, soorlu aamma naggueqatigiit Inuit naalakkersuisoqarfinni sulisut amerlisimanerat nuannaarutissaasoq.
