2007-imi saattuartassat isumaqatigiinngissutaapput
Pinngortitaleriffimmi biologit aappaagu 2007-mi saattuarniarnerissamut ilaatigut taama siunnersuipput. Saattuanik piujuaannartitsinissaq saattuanik tunisassiortut Nukik Seafood-tikkut biologillu tamarmik isumaqatigiissutigaat. Qanorli ililluni saattuarneq ingerlanneqassava? Apeqqut tamanna akerleriissutaavoq. Siullermik Pinngortitaleriffimmi saattuanik ilisimatooq Ann Dorthe Burmeister ima oqarpoq:
Qeqertarsuup Tunuani Sisimiullu avataanni misissuinitta ersersippaa, saattuat qaleruaat aqippallaartut, aamma paasivarput saattuat februaarimi marsimilu qaleruatik taarsertaraat. Taamaattumik aqitsunik qalerualinnik eqqaasarnerujussuaq annikillisinniarlugu, akornusersorneqaratillu kinguaassiornissaat qulakkeerumallugu, siunnersuutigaarput saattuarniarneq marsip naaneraniit juulip qeqqata tungaanut ingerlanneqartassasoq, Pinngortitaleriffimmi saattuanik ilisimatooq, Ann Dorthe Burmeister, oqarpoq. Tamatumunnga Nukik Seafoodtip pisortaa, Petrus Biilmann, isumaqataanngilaq:
- Nuuup avataanit avannamut saattuarniarneq januaarip aallaqqaataaniit marsip naaneranut matoqqasarpoq. Taanna kukkussutigereerpaat.
Qeqertarsuup Tunuamiut apriilip qeqqata missaaniit saattuarniarsinnaalersarput.
-Taamaammat apriilimiit juulimut saattuarniarnermi qaammatit pingasuinnaapput, tamannalu matuersaammik matusinertut oqaatigiinnarneqartariaqarpoq.
Petrus Biilmannip biologit aalajangersaasartuunatik siunnersuisartuinnaanerat assut qujaginerarpaa, pisassanut Naalakkersuisut aalajangiisartuummata.
Saattuarniarnerup qanoq ingerlasinnaaneranut siunnersuuteqarpoq:
Umiarsuaq qerititaasortoq Qeqertarsuarmut decembarimi tikittarpoq, taamaattumik saattuarniarneq decembarip aallaqqaataaniit apriilip tungaanut matoqqatinneqartarsinnaagaluartoq, Petrus Biilmann oqarpoq. Aamma imaassinnaanerarpaa, oktobarip naaneraniit - issippallaalerneraniit apriilip tungaanut saattuarniarneq matuneqartarsinnaagaluartoq. Periarfissanut pingajorisinnaanerarpaa novembarip aallaqqaataaniit marsip naaneranut matoqqatitsineq.
Aalisartunit ukiut sisamassaa biologinut oqaluttuarineqartarpoq, saattuat qaleruaminnik ukiup ingerlanerani taarsersuisartut, tamarmik ataatsikkorsuaq taarsiinatik. Biologillu oqarsimagunik, piffissami aalajangersimasumi qaleruatik taarsertaraat, taava kukkusimassasut, Nukik Seafoodtip pisortaa oqarpoq.
Aappaagu saattuartassiinissaq Naalakkersuisunit ukiortaareerpat aalajangiiffigineqassaaq.
