2006-imi imminortut 54-iupput
Nunatsinni siorna 2006-imi imminorsimasut 54-iupput, agguaqatigiissillugu naatsorsoraanni sapaatip akunneranut ataasiarluni imminortoqartarsimavoq, avisimi Sermitsiami taama allaaserinnittoqarpoq.
Taama saqqummiussinermut atatillugu Paarisami ataqatigiissaarisup Jette Eistrupip erseqqissaatigaa imminorneq nunatsinni ukiorpassuanngortuni ajornartorsiutaasoq annertooq. Imminornermut akiuiniarluni ukiut ingerlaneranni assigiinngitsunik suliniuteqartoqartarpoq.
Siorna imminorsimasut amerlanersaat inuusuttuupput, taakkunanilu angutit amerlanerpaasimasut, tamannalu pissutigalugu pitsaaliuiniarluni suliniarnermut atasumik internettikkut Paarisa nittartagaliorsimavoq.
Pitsaaliuilluni suliniutinut inuiaqatigiit tamarmik peqataanissaat Jette Eistrupip neriuutiginerarpaa.
Meeqqat inuusuttullu oqarasuaatip normuanut 134-imut sianerlutik, kinaassusertik taanngikkaluarlugu siunnersuisartumik oqaloqateqarnissaminnut periarfissaat ukioq manna aamma atuutissaaq.
Akitsinni Nunavummi siorna aatsaat taama imminortoqarsimatigisoq, Nunatsisaq Newsimi allaaserineqarpoq.
Nunavummi siorna imminorsimasut katillutik 29-iusimapput, Nunavummilu imminorsimasut Canadap sinnerani imminorsimasunut naleqqiukkaanni ukiumut aqqanileriaammik amerlanerukkajuttarput.
Kalaallit Alaskamiullu imminortarnermut pinaveersaatsitsiniarlutik politikkikkut suliniuteqartut Nunavummili oqartussat tungaannit aalajangersimasumik suli suliniuteqartoqanngitsoq, Nunatsiaq Newsimi erseqqissaatigineqarpoq.
