2000-it silaannaq pillugu ataatsimeersuarput
Silaannaap allanngoriartorneranut annikillisitsiniarluni Kyotomi isumaqatigiissutip taartissaa pillugu nunat tamalaat Tysklandip illoqarfissuisa ilaanni Bonn-imi sapaatip akunnerini marlunni ataatsimeersuarnerat inunnit 2000-init nunanit 190-ineersunit peqataaffineqartoq ippassaq aallartippoq.
Kyotomi isumaqatigiissutip silaannarmik toqunartortalimmik aniasitsinerup ukioq 2012-utinnagu annikillisinneqarnissaanut nunat 35-it pisussaatippai, isumaqatigiissutillu nunarsuarmi nunanit pisuujunerpaanit suliffissuaqarfiusunilllu, soorlu USA-mit Kinamit Indiamit Brasiliamillu atsiorneqarnissaa ataatsimeersuarnerup pingaarnertut siunertarigaa, tuluit nutaarsiassaqartitsiviat bbc tusarliussivoq.
Ataatsimeersuarnermut qaaqqusisut tyskit, nunarsuarmi nunat pisuujunerpaat arfineq pingasut suleqatigiiffissuanni G8-mi aamma siuttuusut kansleriata Angela Merkelip neriorsuutigaa, G8-it juunimi ataatsimiilerpata silaannaap allanngoriartorneranut tunngasut pingaarnerpaatillugit oqaluuserineqarumaartut.
Silaannaq pillugu Bonnimi ataatsimeersuarnermi aamma nukissiuutinik atuilluarsinnaanermut, piujuaannartitsinissamik tunngaveqarluni nukissiuutinik atuinerunissamut, ikummatissanillu silaannarmik mingutsitsinngitsunik ineriartortitsinermut tunngasunik saqqummersitsisoqassaaq.
