1993-2008: Immami ajutoornerit 192-it
2001-imi kilisaat Imerissoq, Kangaatsiap avataani sikumit kiggigunneqarpoq ikkarlummullu qanilliartulerluni. Aquttup motoori tamakkersortillugu sikumit kaanngarniarsarigaluarami sarfaqimmat kilisaat ikkarlippoq, inuttallu arfineq-marluk kilisaammit allamit annaanneqarput. Kilisaalli Imerissoq annaanneqarsinnaanani kivivoq.
Paasiniaasartulli nalunaarput, ajutoornerit tamaasa ilisimasaqarfiginagit. Kalaallit Nunaata imartaani ajutoornerit tamarmik sinerissami alapernaarsuisunut piaartumik nalunaarutigineqartarnissaasa pingaaruteqarnerat, Imarsiornermik Qullersaqarfiup paasiniaasartuinit nalunaarusiami erseqqissarneqarpoq. Kalaallit Nunaanni sila allanngoriataartarmat sumiiffiillu ilaat qanillattoruminaattarmata kiisalu ujaasisinnaasut annaassiniarsinnaasullu killeqarmata, tamatuma pingaaruteqarnera paasiniaasartut nalunaarusiaminni erseqqissarpaat.