18-it inorlugit ukiullit marluk Nanortalimmi toqutsisutut pasineqartunut ilaasut
Nanortalimmi arfininngornerup unnuaani toqutsisimasutut pasineqartunit sisamanit marluk 18-it inorlugit ukioqarput.
Kalaallit Nunaanni Politiit tusagassiuutinut nalunaarummi paasissutissiipput.
Pasineqartunit marluk suliamut atatillugu pisuusutut eqqartuunneqassagunik ukui pissutigalugit pineqaatissinneqarsimasunut inissiisarfimmiittussanngortinneqarsinnaanngillat. Tassungali taarsiullugu inuusuttunut inissiisarfimmiittussanngortinneqassapput.
AAMMA ATUARUK Nanortalimmi politiit toqutsisoqarsimaneratut misissuisut
Inuit sisamat politiit misissuinerata ingerlanerani ulluni 25-ni tigummigallagassanngortinneqarput.
Nanortalimmi Tukingasup aqquserngani inummik ilisimanngitsumik nalasoqartoq politiit arfininngornermi ullaakkut nalunaaqutaq 05:20 kalerrinneqarput. Angut 40-t qiteqqunnerani ukioqartoq toqusimasoq tamatuma kingunitsiannguaq peqqinnissaqarfimmi sulisunit paasineqarpoq.
Nanortalimmi politiit nunap immikkoortuani sumiiffinnit marlunnit ikiortissarsiorput, Naalagaaffiup politiivinit pinerluttulerinermut tunngasunik misissuisartunit aggersaallutik.
Toqungasup pinerluttuliornermi misissuisartut marluk toqungasullu timaanik misissuisartoq politiit misissueqqissaarnerannik ikiuuttussat toqqutaasumillu misisissueqataasussat marlunngornermi tikinnissaat naatsorsuutigineqarpoq.
