18-inik eqqartuussineq aallartippoq

- Aatsaat taama amerlatigisunik ataatsikkut tigusaqarpugut, unnerluussisoq Finn Jeppesen oqarpoq.

Tallimanngormat eqqartuunneqartut Greenpeacemeersut marluk, Hannah McCarthy aamma Luke Jones, ullaaq nalunaaqutaq arfineq marlunut Nunatsinnit anisitaallutik Europamut aallartinneqarput, ukiup ataatsip iluani Nunatsinnut tikeqqusaajunnaarlutik.

Hannah-p aamma Luke-p ilungersoqataat 18-it aamma taakkutorluinnaq pineqaatissinneqarnissaat ilimagineqarsinnaavoq.

Avatangiisit pillugit ilungersuutiginnittut 18-it arfininngormat politiinit tigusarineqarput, tamanna pivoq taakku qillerivimmi Leiv Eirikssonimi nalunaaquttap akunnerini qulini qaqeqqareersullu. Arfininngornermi ullaassakkut nalunaaqutaq tallimap missaani Greenpeacermiut 18-it annanniummut ilaallutik umiarsuarminniit Esperanzamit aallarput qillerivissuarmullu qaqillutik.

Issittup imartaanni uuliamik ujaasineq avatangiisinik sumiginnaanerusoq, qillerivimmi qaqeqqanerminni nilliallutik oqariartuutigaat aammalu ajutoortoqassappat pilersaarutit Aatsitassat pillugit Oqartussaqarfiup Cairn Energyllu isertuukkaat nilliaatigaat. Taakku 18-it akerliussutsimik takutitsinerat nalunaaquttap akunnerini qulingajanni ingerlareersorlu politiinit tigusarineqarlutik Nuuliaanneqarput, Nunatsinnit anisitaanissaat aammalu akiliisitaanissaat siunertaralugu eqqartuunneqartussaassallutik.

- Nalunaaqutaq ataatsimut eqqartuussineq aallartippat, Nunatsinnit anisitaanissaasa tungaanut politiinit tigummiinnarneqarnissat piumasarissavarput. Nunatsinnit anisitaanissaat eqqarsaatigalugu tamanna pisinnaanngilaq Danmarkimi nunat allamiut pillugit aqutsisoqarfimmit aalajangersakkamik peqqaartinnata. Tallimanngormat eqqartuunneqartut kingulliit pineqaatissinneqarnerat tunngavigalugu, uku 18-it aamma taakkutut pineqaatissinneqarnissaat naatsorsuutigaarput. Aammalu taakku 18-it tamarmik immikkut 20.000 koruuninik akiligassinneqarnissaat naatsorsuutigilluinnarparput, unnerluussisoq Finn Jeppesen oqarpoq.

Avatangiisit pillugit ilungersuutiginnittut unnerluutigineqarput eqqissiviilliortitsisimasutut aammalu sillimaniarneq pillugu oqartussanit tikinneqaqqusaasimanngitsumiissimasutut.

Hollandimi  Cairn Energyp Greenpeacemut eqqartuussivilersuussinera nalunaaquttap akunnerini makkunanerpiaq ingerlanneqarpoq, tassani pineqarluni Greenpeacep Cairn Energy-p qillerinissaanik akornusersuinera pillugu eqqartuussineq. Cairn Energyp tassani piumasariniarpaa Greenpeace ullormut 2 million euronik akiliisitaanissaa.

Hollandimi eqqartuussineq ullaq aqqarnup qeqqanut aallartippoq, tamassumalu inernera Radioaviisimit malinnaavigissavarput.