17-nik ukiulik suli nassaarineqanngitsoq
17-inik ukiulik Bergithe Josefsen, ukioq manna apriilip ulluisa aqqarnanni kingullermik takuneqartoq Nuummi politiit suli ujaaraat.
Bergithe Josefsen, ukiukinnerunini pillugu Nuummi inissikkallarneqarsimasuusoq, pillugu politiit paasissutissanik nutaanik pissarsisimanngitsut Nuummi politiini pigaartuuneq Lina Davidsen KNR-imut ilisimatitsivoq.
Bergithe Josefsen politiit nalunaarutigisaattut 17-inik ukioqarpoq, qernertunik nujaqarluni, 150 aamma 160 centimeterit akornanni angissuseqarluni, nalinginnaasumillu isikkoqarluni.
Qiviusanik oqorsaasikkamik aaqanngitsumik qernertumik kavaajaqarpoq, tujuuloq aappalunngusersortoq, qarliit tungujortut, nasaq kamippaallu qernertut.
Politiit niviarsiaqqap ilagisartagaannut misissuinerat suli kinguneqanngimmat, innuttaasut Bergithe Josefsen pillugu paasissutissaateqartut politiinut saaffiginninnissaat Nuummi Politiit kajumissaarutigaat.
Bergithe Josefsen pillugu paasissutissat Nuummi politiinut ingerlateqqinneqarsinnaapput. Nuummi Politiit oqarasuaataasa normoraat 70 14 48.
Inuk politiinit ujaarineqartoq inisimasuutigigaanni, sumiinneraluunniit ilisimagaanni tamannalu ingerlateqqinngikkaanni pinerluuteqarsimasutut pineqaatissiissutigineqarsinnaasoq, Nuummi Politiit eqqaasitsissutigeqqippaat.