17-inik ukiullip pineqaatissiineq ingerlateqqissavaa
Kalaaleq maanna 17-nik ukiulik taamaalilluni pineqaatissiissutigineqarsinaasoq sakkortunerpaaq atorlugu pillagaasussanngorpoq.
Pineqaatissiineq atuarneqarsimatsiartoq 17-inik ukiulik illersortinilu pineqaatissiineq sakkortugalugu ingerlateqqinniarlugu nalunaarput.
Eqqartuussissuserisup illersortaasup oqaatigaa, 17-inik ukiulik nukappiaratsialaasoq ilakkuminarlunilu innimiitsuunngikkaluarmat, pineqaatissiineq sakkortuallaarujussuartoq. Pinerlunnerummi nalaani nanertisimasimasoq, aliasulluni saaffissaaruttutullu misigisimagami paatsiveeruttutut pinerlussimasoq. Nukappiaq eqqartuussivimmi oqaluttuarpoq aliasussimaqaluni, ilaatigut angajoqqaami avinnerat pissutigalugu. Taamaammallu Kalaallit Nunaanni nalunngisamink oqaloqateqarusussimagaluarluni oqarasuaatinili imaqarpiangimmat sianernissaminut akissaqannginnami periarfissaqarsimanani. Inissiat ilaannut iseqqaarsimagaluarpoq arlaata sianertissinnaaneraani takuniarlugu. Gerda Møllerillu ineqarfianut isermat Gerda Møllerip qimaguteqqusimavaa, taamaammallu puffalluni paatsiveerussimalluni. Pinngitsaaliineq toqutsinerlu oqaluttuarigamigit iluamik eqqaamasinnaanagit arlaleriarluni oqartarpoq.
Nakorsat misissuisut 17-inik ukiulik pineqaatissineqarsinnaasoq nalunaarutiginikuuaat. Eqqartuussisullu sakkortuumik pineqaatissiinerminut pinerlunnerup peqqarniinnera pissutigalugu taamatut aalajangernerarpoq.