134-mut saaffiginnittarnerit amerliartorput

PAARISA-p Meeqqat Inuusuttullu Oqarasuaataanut ”134”-mut saaffiginnittarnerit amerliartuinnarput, tamanna kisitsisit siornarnisat takutippaat.
Allattoq Louise M. Kleemann
juunip 10-at 2008 06:39

Siorna saaffiginninnerit 28 procentinik, tassalu 964-init 1.234-nut amerleriarsimapput, ukiup siulianit marloriaammik amerliarsimallutik.

Naak sianertartut amerlasuut paasissutissanik piniarlutik imaluunniit sianeraluarlutik suli siunertaminnik apuussinatik oqarasuaammik ilisiinnartaraluartut meeqqat inuusuttullu amerlasoorpassuit ”134”-imut sianernerminni siunnersortinit ikiorserneqartarput.

2007-imi oqaloqatiginnilluni siunnersuinerit affaat sinnerlugit amerlassuseqartut tassaapput niviarsissat 18-it inorlugit ukiullit siunnersorneqarnerannut tunngasut, siunnersuinerilli sisamaagaangata ataaseq nukapissamik imaluunniit angummik siunnersuinerusarput.

2007-imi saaffiginnissutigineqartuni imminorneq, persuttaaneq, kinguaassiuutitigut innarliineq, aanngajaarniutinik atornerluineq kiisalu qinngasaarineq saaffiginninnermut tunngaviunerpaasarput. Siunnersuilluni oqaloqatiginninnerit affaat sinnerlugit amerlassuseqartut ajornartorsiutinut taakkununnga tunngasuupput.

Meeqqat Inuusuttullu Oqarasuaataat ”134” ukioq naallugu nal. 19.00 – 21.00 ammasarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq