112-it 57 million koruunit agguarpaat
Inatsisartuni ilaasortap Siumumeersup, Karl Lyberthip, paragraf 37 naapertorlugu apeqquteqaataanut Naalakkersuisut siulittaasuata, Kuupik Kleistip, akissutaani tamanna erserpoq.
Royal Greenlandip Aalborgip eqqaani Svenstrupimi allaffissornermut immikkoortortaani sulisut akissarsiaat akileraartarnerallu Karl Lyberthip arlalinnik apeqquteqarluni apeqquteqaatigai. Immikkoortortaqarfimmi tassani sulisut 122-upput. Tuniniaaneq, nittarsaassineq, aningaasaqarneq suliffeqarfimmilu atugassanik pisiortorneq, nioqqutissanillu ingerlateqqitassanik piareersaaneq aqutsinerlu taakku suliarisarpaat.
Allaffissornikkut qitiusumik suliarineqartartut Kalaallit Nunaannut inissikkuminaattarput, ingerlatseqatigiiffimmi nunani tamalaani sullissaqartarmat. Kuupik Kleistip akissutaani tamanna erserpoq.
Tamakku saniatigut ingerlatseqatigiiffiup suliassaqarfiit aalajangersimasut suliamut tunngatillugu piginnaasaqarfiusussat Nuummi inuttaleruminaatsittarpai. Suliassalli Nuummi qitiusumik allaffeqarfianut sapinngisamik ingerlaavartumik nussorniartarpai.
Royal Greenlandip Danmarkimi allafeqarfiani sulisunut akissarsiarititai 57 millionit koruunit missaanniipput, sulisullu 112-iusut 18,4 millionit koruuninik akileraartarput.
Allaffeqarfiup ingerlatsinermut aningaasartuutai 5,5 millionit koruuningajalluinnaapput - taakkunannga ineqarnermut akiliutit 3,8 millionit koruuniullutik. Allaffimmik piginneqataasoq tassaavoq Nunatsinni soraarnerussutisiaqalernissamut aningaasaateqarfik, SISA.
