Akileraarutit akitsuutilluunniit qaffassanerpat imaluunniit suliniutaareersunit sipaarniuteqartoqassava.
Naalakkersuisut 2008-mut aningaasanut inatsisissamut siunnersuut ullumi saqqummiummassuk, erserpoq, nunarput aningaasarsiorfiullualeraluartoq, aappaagumut aningaasat 100 mio. koruunit arlaanninngaanniit nassaarisariaqartut.
Ilinniartitaaneq, meeqqat utoqqaallu nunatta karsianit aningaasaliiffigineqarnerunissaat amigartoornissamut pissutaasut, Aningaasaqarnermut Naalakkersuisoq Aleqa Hammond oqarpoq:
Ilanngutassiaq: Aningaasanut Inatsisissaq 080807 k 1’40
-Amigartooruteqarnissamut missingersuusiorpugut, taamaakkaluartoq saniatigut erseqqissaassutigalugu aningaasat immikkut aasariaqartut 100 mio. koruuninik nalillit aamma aningaasanut inatsisissap siunnersuutigineqarnerani nassaarineqartariaqartut, Aleqa Hammond nassuiaavoq.
Naalakkersuisuninngaanniillu erseqqissaassutigaat aningaasanik aallerfissanut periarfissat pingasuusut.
- Akileraarutitigut qaffaasoqarsinnaavoq, akitsuutitigut qaffaasoqarsinnaavoq imaluunniit allatigut sipaarniarnikkut pingaarnersiuinikkut aallertoqarsinnaalluni, oqarpoq.
Kisianni naalakkersuisuninngaanniit aningaasat suminngaanneerpiaq aaneqassanersut suli taaneqanngilaq, pingaartinneqarmat inatsisissatut siunnersuutip saqqummiunneqarnerata kingorna qanoq isummersuutit tusarniaanerillu inerneqarumaarnerat paaseqqaassallugu.
Taakkumi 100 mio. koruunit suminngaannit aaneqarsinnaappat?
- Periarfissat amerlapput, soorunami. Uagut nammineq Namminersornerullutik Oqartussat iluani allaffissornikkut sipaarniarnitsigut annertuumik alloriareerpugut. Taassuma saniatigut eqqaasinnaavara nunatsinni akileraarummik 1 procentiinnarmilluunniit qaffaasoqarsinnaannera, nangippoq.
Akileraarutip 1 procentimik qaffannera nunatta karsianut 63 mio. koruuninik naleqassaaq.
- Ilaqutariinnguanut 350.000 koruunit qaangernagit isertitaqartartunut ukiumut akileraarut 2.300 koruunit sinnerlugit qaffaanerusussaavoq, taamaattumik aningaasat amerlammata pingaaruteqarpoq, aningaasanik aallerfissaq aalajangertinnagu isummat assigiinngitsut tusaqqaarnissaat. Tusarniaanerup kingorna naalakkersuisuninngaanniit siunnersuuteqarumaassaagut.
Aningaasaqarnermut Nunanullu allanut Naalakkersuisoq Aleqa Hammond aamma oqarpoq, partiit allat aningaasanut inatsisissaq pillugu isumaqatigiinniarluarfiginissaat qanoq aalajangernissamut apeqqutaasorujussuussasoq.
Aningaasaqarnerup 100 mio. koruuninik aappaagu pitsanngoriarnissaa anguniagaagaluartoq, naalakkersuisut missingersuusiaat malillugu 2008-mi nunatta karsia 295 mio. koruuninik amigartooruteqassaaq. Ukiunili tulliini pingasuni 2009-mit 2011-mut agguaqatigiissillugu 134 mio. koruuninik sinneqartooruteqarnissaq missingersuusiarineqarpoq.
