10. klassemi atuartut 16-t anisitaasut

Nuummi 10 klasse-mi atuartut 16-t atuanngitsuukulavallaarmata atuarunnaarsinneqartariaqarsimapput.

Atuarfiup pineqartup pisortaa isumaqarpoq ikiaroornartumik imigassamillu atuipilunneq ajornartorsiummut peqqutaaqataasut, Nuup kommunianili Meeqqanut Kultureqarnermullu pisortaq oqarpoq atuarfik imminut aamma qiviarsinnaasariaqartoq.

Nuummi atuarfiit ilaanni Qorsussuarmi atuartut 16-t ima atuanngitsuukulatigisimapput allaat akunnerni atuarfiusussani 20 procenti sinnerlugu atuanngitsoorsimallutik, atuanngitsoorsimanitillu aaqqiiviginiarsarinngimmatigik atuarunnaarsimasutut naatsorsuutigineqalersimapput.

- Takkutinngitsoortarnerup ilarujussuanut imigassamik ikiaroornartumillu atornerluineq pissutaasoq qularutiginngilluinnarpara, taama aviisimut AG-mut oqarpoq atuarfiup pisortaa Hans Peter Broberg.

Taannattaaq Atuagagdliutinut oqarpoq angajoqqaat pisooqataalluinnartuusut qitornamik sulerinerat sianigineq ajormassuk.

Nuup kommuniani Meeqqanut Kultureqarnermullu pisortaq William Kriegel oqarpoq ajornartorsiut ilisimaarigitsik.

- Erseqqissaatigerusupparali atuarfimmiit anisinneqartanngimmata atuartut atuartuuniarunik atuartuusariaqarput, oqarpoq.

Taamatuttaaq William Kriegel oqarpoq atuartut ilinniagaqarnissaminnik toqqaanissamininngarnit atuanngitsoorneq qinerusunnerusimappassuk arlaannik ajortoqarsimassasoq.

- Taamak amerlatigisut atuarunnaarsimappata taava apeqqusertariaqassaaq sunaana taava akornutaasimasoq? Aamma soorunami atuarfik imminut qiviartariaqarpoq taamaaliortuartarporlumi. Amerlavallaartut ajoraluartumik atuarunnaarput, Nuup kommuniatali akisussaaffik tigunikuuaa, atuartut iperaannarnagit attavigineqartarput Piareersarfiup inuusuttut attavigissallugit akisussaaffigaa, taama oqarpoq Nuup kommuniani Meeqqanut Kultureqarnermullu pisortaq William Kriegel.