QULAARPAA 1 procentiinnaat inuussutissarsiornerup iluani ilinnialertarput

Meeqqat atuarfianni naammassisut 1 procentiinnai toqqaannarlutik inuussutissarsiornerup iluani ilinniakkamik aallartitsisarput.

- Ilaquttamik qanigisamik toqusoorluni ilinniarusukkaluarluni praktikkerfissaqarani, Hans Gabriel Kristensen, 26-nik ukiulik Ilulissat eqqaanni Saqqaminngaanneersoq taama oqaluttuarpoq. Taanna meeqqat atuarfiat 2007-imi naammassigamiuk ingerlaannarluni sanasunngorniassalluni qinnuteqarpoq.

- Telefonbogini sanasut tamaasa Kalaallit Nunaat tamakkerlugu apersoraluarpunga, ilai sanaassaqanngitsut, ilaasa oorit amigaatigigaat. Qasunaq pakatsinarlunilu, Hans Gabriel Kristensen oqarpoq.

2015-imi 759-it inuussutissarsiornerup iluani ilinniarfinnut qinnuteqarput ilinniakkamilli aallartitsinatik. Ilinniakkamilli aallartitsinngitsoorneq tamatigut praktikkerfissaarunneq pissuteqarneq ajorpoq. Praktikkerfissaaruttarnerli pissutaanerpaasartoq Sisimiuni Sanaartornermik Ilinniarfimmi qularineqanngilaq.

Qinnuteqartorpassuarni akuerisat amerlanngillat

- Praktikkerfissat naliginnaasut ikileriarnerat takusinnaavara. 2008-miit ullumikkumut kisitsisit takussagutsigit, praktikkerfissat amerlassusaat affaannanngorsimapput, KTI-mi, tassa Teknikkimik Ilinniarfimmi, saviminilerinermik sanaartornermillu immikkoortortaqartup, forstanderi, Jokum Møller oqarpoq.

Siorna Sisimiuni Sanaartornermik Ilinniarfimmut qinnuteqartut 143-it ilinnialernissamut piukkunnartutut nalilerneqarput, qinnuteqartunili 29-iinnaat suliffeqarfinni praktikkerfissaminnik nassaarlutik.

Hans Gabriel Kristensenip sanasunngornissani suli takorloorpaa, arlaleriarlunili itigartarsimanera oqitsuinnaanngilaq.

- Itigaqqissanasoralunga tigusaasaraluarlunga praktikkerfissaqannginnasoralunga qinnuteqaqqinngilanga, Hans Gabriel Kristensen taama oqarpoq.

Sisamanngorpat TV-kkut Qulaarpaa toqqaannartumik aallakaatinneqalerpat praktikkerfissaaruttarneq oqallisigineqassaaq.