1 maj sulisartut ulluat
Ullumi ulloq maajip aallaqqaataat nunarsuarmi sulisartut ulluattut nalliussineqartarpoq, Nunatsinni Sulinermik Inuussutissarsiuteqartut Kattuffiata siulittaasua Jess G Berthelsen Nuummi sulisartut katersortarfimmi katersuunneranni oqalugiarpoq. Suummita pingaarnerutillugit ullumi oqariartuutigisimavai, Jess G Berthelsen ima oqarpoq:
- Tassa oqaatsivut namminilivinnissaq, ilinniartitseqqiinerit aammalu isumaqatigiinniarnissaq ullumi oqalugiarninni eqqartorpakka. Maannakkut eqqumiiginartumik GA-mut isumaqatigiinniarnerit ingerlanneqarput. GA qallunaat kattuffiannut isumaqatigiissuteqarsimavoq 9,2 procentimik, taamaakkarluartorlu uagutsinnut isumaqatigissuteqarumanngilaq 9,2 procentimik. Uagutsinnunngooq annertuallaarmat.
Jess G Berthelsen isumaqarpoq GA ammip qalipaataa tunngavigalugu immikkoortitsisunngorsimasoq, assigiinngisitsisunngorsimasoq.
- Danmarkimi kattuffinnut aallaavilimmut taama isumaqatigiissuteqarumariarluni kalaallinut maanna annertuallaarneraalerpoq. Tamanna pissusissamisuunngilaq.
SIK piumasaqarpoq suliffeqarfinni maannakkut sulineq oqaatsivut aallaavigalugit ingerlanneqalertariaqartoq.
- Isumaqaratta sulisartoq oqaatsini tunngaviginagit suliguni affaannarsorluni sulissasoq.
Jess G Berthelsen erseqqissaavoq SIK oqaatsinik allanik ilinniarnissamut pingaartitsisuusoq. Oqaatsinik allanik ilinniarneq meeqqat atuarfiatigut qulakkeerneqarsinnaasoq. Pikkorissartitseqqiinerit ilinniartitseqqiinerillu ullumikkut annertunerusumik ingerlanneqartariaqarsut Jess G isumaqarpoq.
- Tassami kuultisiornerit aatsitassarsiornerit sanaartornerillu anertoorujussuarmik ukiuni tulliuttuni
Ingerlanneqartussaapput. Maannalu 2000-it sinnerlugit suliffissaaleqipput. Taamaattumik ilinniartitseqqiinerit manna pisariaqarput ilaasortagut 100 procentimik atorneqarsinnaaniassammata.
Angallaneruttaaq aaqqiivigineqartariaqarnera eqqaavaa.
- Sinersortaatit tupigeqisatsinnik namminersortunut tunineqarsimapput akikitsuarakasimmik. Tamatumalu kingunerisaanik angalaniarneq ajornarnerulerpoq akitsorlunilu. Tamanna pissusissamisuunngilaq taamaattumik inassutigaarput naalakkersuisut sukkanerpaamik angallanermut tunngatillugu aaqqissuteqarniaqqullugit.
