Nunarput allattorsimaffimmi appariartuinnartoq: 'Ajuusaarnartorujussuuvoq' aamma 'pitsaanngilaq'
Ajuusaarnartorujussuuvoq aamma pitsaanngilaq.
Nunatta aatsitassarsiortunit aningaasaliiffigissallugu pilerinarunnaariartuinnarnera Inuit Ataqatigiinnit Demokraatiniillu taama oqaasertalerneqarpoq. Nunatsinni aatsitassarsiornermik suliniutinik aallartisaaniarneq arriippallaarlunilu pisariuallaartoq, aatsitassarsioqatigiiffiit ilaatigut taama isornartorsiuteqarput.
Nunat aningaasaliiffigissallugit pilerinarnerpaat nalunaarsorsimaffianni nunanit 83-iusunit nunarput normu 63-itut inissisimasoq, Fraser Institutep nalunaarusiaani atuarneqarsinnaavoq.
Nunarput 2013-imi 112-iusunit normu 7-itut inissisimagaluarpoq.
- Sulisitsisut, Naalakkersuisut, Kunngikkormiut, Dansk industri danskillu naalakkersuisui nunatta aningaasalersuisartunut aatsitassarsiortunullu nunarsuarmit tamaneersunut nittarsaannissaanut inuit 70-init amerlanerusut aallartippaat.
- Aningaasaqarneq pillugu Siunnersuisoqatigiit 2018-imut nalunaarusiaat naapertorlugu aatsitassat nunatsinni piiarneqarsinnaasut ilarpassui akitsornissaat naatsorsuutigineqarpoq.
- Suliniutit arlallit ukiuni aggersuni aallartinnissaat naatorsuutigineqarpoq.
- Aatsitassarsiornermut akuersissuterpassuit tunniunneqartut pilersitsisoqarneranik kinguneqassappata, nunatta aningaasaqarneranut iluaqutaallualersinnaapput.
Inatsisartut Inuussutissarsiornermut Aatsitassanullu ataatsimiititaliaanni siulittaasup, Simon Simonsenip (S), Naalakkersuisut nassuiaateqarnissaat piumasaraa.
- Sunik aallaaveqarneri soorunami nassuiartinneqartariaqarput, aammalu soorlu sunik tunngaveqarnersut, siulittaasoq oqarpoq.
Uggornartoq
Nunatta Danmarkillu aallartitaat, ilaatigut Naalakkersuisoq Erik Jensen, kunngissaq danskillu nukissiuuteqarnermut ministeriat aatsitassarsiorneq pillugu nittarsaassinermut PDAC-mut peqataallutik ulluni makkunani Canadamiipput.
Illuatungiliuttuneersut aamma peqataapput. Inuit Ataqatigiinnersoq Mute Bourup Egede peqataavoq taamatuttaarlu Demokraatineersoq Randi Vestergaard Evaldsen. Nunattalu allattorsimaffimmi inissisimanera taakku naammaginartinngilaat.
- Soorunami taamatut pitsaassutsikkut appariartornermut inissinneq taanna apeqquserneqarsinnaavoq, aammalu pitsaanngilaq, Mute Bourup Egede taama oqarpoq.
- Soorunalimi siullermik ajuusaarnartorujussuuvoq taamak apparsimatigigatta, Randi Vestergaard Evaldsen oqarpoq.
Pisariinnerusariaqartoq
Taakku isumaqarput suliffeqarfiit nunatsinnut saaffiginnittarnerat iliuuseqarfigineqartariaqartoq, pisariinnerulersillugu.
- Politikkikkut patajaatsumik ingerlatsineq suli sukarsartariaqarparput. Aamma pingaaruteqartorujussuuvoq aningaasaleerusuttut assigiinngitsut saaffiginnikkaangata matu ataaseq toqqaannartoq atortalernissaa. Ilaatigut aporfissalersuisarnerit atorfilittaninngaanniit tamakkua peertariaqarpagut, ataatsimullu aamma sammisalimmik suleriuseqalerluta, Randi Vestergaard Evaldsen taama oqarpoq.
- Eqaallisaaneq, matu ataaseq aammalu eqaatsumik sulineq aporfissalersuisanani, Mute Bourup Egede taama oqarpoq.
